Welcome to SIA

    ພ້ອມກັນຕ້ານການສໍ້ລາດບັງຫຼວງທຸກຮູບແບບ

ກອງປະຊຸມປຶກສາຫາລືລະຫວ່່າງອົງການກວດກາລັດຖະບານ ແລະ ອົງການກວດສອບແຫ່ງລັດ ໃນວັນທີ 23 ພະຈິກ ປີ 2015

ອີເມລ ພິມ PDF

ອົງການກວດກາລັດຖະບານແລະ ອົງການກວດສອບແຫ່ງລັດໄດ້ຈັດກອງປະຊຸມທົບທວນແລະປຶກສາຫາລືກ່ຽວກັບການປະສານງານລະຫວ່າງສອງອົງການກວດສອບແຫ່ງລັດແລະ ອົງການກວດກາລັດຖະບານ ປະຈໍາປີ 2015 ​ຂຶ້ນໃນວັນທີ 23 ພະຈິກ 2015 ທີ່​ສະ​ໂມ​ສອນ​ອົງການ​ກວດ​ສອບ​ແຫ່ງ​ລັດ, ໂດຍການເປັນປະທານຮ່ວມຂອງສະຫາຍ ດຣ. ບຸນທອງ ຈິດມະນີ ກໍາມະການກົມການເມືອງສູນກາງພັກ, ເລຂາທິການສູນກາງພັກ, ປະທານຄະນະກວດກາສູນກາງພັກ, ປະທານອົງການກວດກາລັດຖະບານ, ຫົວໜ້າອົງການຕ້ານການສໍ້ລາດບັງຫຼວງຂັ້ນສູນກາງ ແລະ ສະຫາຍ ດຣ. ນາງ ວຽງທອງ ສີພັນດອນ ເລຂາຄະນະພັກ, ປະ ທານອົງການກວດສອບແຫ່ງລັດ, ໃຫ້ກຽດເຂົ້າຮ່ວມມີບັນດາທ່ານຮອງປະທານ, ຫົວໜ້າກົມ, ຮອງກົມ ຂອງ​ອົງການ​ກວດກາ​ລັດຖະບາຍ ​ແລະ ອົງການ​ກວດ​ສອບ​ແຫ່ງ​ລັດ, ຫົວໜ້າ, ຮອງ​ຫົວໜ້າອົງການກວດສອບປະຈໍາພາກ, ຫົວໜ້າ​ກົມ​ກວດກາ​ກະຊວງ, ຫົວໜ້າ​ພະ​ແນ​ກກວດກາ​ລັດ​ແຂວງ​ຈໍານວນ​ໜຶ່ງ ແລະ ພະນັກງານຫຼັກແຫຼ່ງຂອງທັງສອງຝ່າຍເຂົ້າຮ່ວມ ຈໍານວນ 113 ສະຫາຍ, ຍິງ 26 ສະຫາຍ.

ກອງປະຊຸມໄດ້ຮັບຟັງການລາຍງານບົດ​ສະຫຼຸບຂອງ ສະຫາຍ ປະດັບເພັດ ໄຊຍະໂຄດ ຮອງປະທານອົງການກວດສອບແຫ່ງລັດ ກ່ຽວກັບຜົນການຈັດຕັ້ງປະຕິບັດບົດບັນທຶກການປະສານງານລະຫວ່າງ ອົງການກວດກາລັດຖະບານ ແລະ ອົງການກວດສອບແຫ່ງລັດ​ໃນ​ໄລຍະ​ຜ່ານ​ມາ ຕາມ​ບົດ​ບັນທຶກ​ສະບັບ​ທີ 1 ພະຈິກ 2013. ຫຼັງຈາກນັ້ນ ສະຫາຍ ຄໍາສຸກ ບຸນຍະວົງ ຮອງປະທານອົງການກວດກາລັດຖະບານໄດ້ຂຶ້ນປະກອບຄຳເຫັນ, ທັງ​ສອງສະຫາຍໄດ້ຍົກໃຫ້ເຫັນໝາກຜົນ​ການຈັດຕັ້ງປະຕິບັດ​ບົດ​ບັນທຶກ ຜ່ານ​ມາ​ມີ​ດ້ານ​ນດີ, ຂໍ້ຄົງ​ຄ້າງ, ຂໍ້ສະດວກ, ຂໍ້ຫຍຸ້ງຍາກ ພ້ອມທັງສະເໜີທິດທາງ, ວິທີການ ແລະ ມາດຕະການໃນການປະສານງານລະຫວ່າງສອງອົງການ ​ໃຫ້​ໄດ້​ດີກ​ວ່າ​ເກົ່າ, ຈາກ​ນັ້ນ ສະຫາຍ​ ສຸກ​ຄໍາ​ເພັດ ​ເຮືອງ​ບຸດ​ສີ ຫົວໜ້າ​ຫ້ອງການ​ອົງການ​ກວດກາ​ລັດຖະບານ​ໄດ້​ຂຶ້ນຜ່ານ​ຮ່າງ​ບົດ​ບັນທຶກການ​ປະສານ​ງານ​ລະຫວ່າງ​ອົງການ​ກວດກາ​ລັດຖະບານ ​ແລະ ອົງການ​ກວດ​ສອບ​ແຫ່ງ​ລັດ​ສະບັບປັບປຸງ ​ເຊິ່ງ​ໄດ້​ກໍານົດ​ເພີ່ມ​ຕື່ມ​ບັນຫາ​ການ​ປະສານ​ງານ ​ແລະ ​ແບ່ງ​ຄວາມ​ຮັບຜິດຊອບ​ໃຫ້​ລະອຽດ​ກວ່າ​ເກົ່າ ​ແລະ ກໍານົດ​ການ​ປະຊຸມ​ຮ່ວມ​ກັນ​ເພື່ອ​ປຶກສາ​ຫາລື​ການ​ກວດ​ສອບ ​ແລະ ການ​ກວດກາ​ ຕາມ​ມະຕິ​ຂອງ​ສະພາ​ແຫ່ງ​ຊາດ​ແຕ່​ລະສະ​ໄໝ​ຢ່າງ​ຕໍ່​າ ປີ​ໜຶ່ງ 2 ຄັ້ງ. ຫຼັງຈາກ​ນັ້ນບັນດາ​ສະຫາຍ​ຕາງໜ້າ​ກົມ​ຂອງ 2 ອົງການ ​ແລະ ຕາງໜ້າ​ອົງການ​ກວດ​ສອບ​ປະ​ຈໍາ​ພາກ, ຫົວໜ້າ​ກົມ​ກວດກາ​ກະຊວງ ​ແລະ ຫົວໜ້າ​ພະ​ແນ​ກກວດກາ​ລັດ​ແຂວງ ກໍ​ໄດ້​ຂຶ້ນ​ປະກອບ​ຄໍາ​ເຫັນ​ຕໍ່​ກອງ​ປະຊຸມ ​ເຊິ່ງ​ແຕ່​ລະສະ​ຫາຍ​ໄດ້​ລາຍ​ງານ​ການ​​ເຄື່ອນ​ໄຫວ​ກວດ​ສອບ, ກວດກາ​ຜ່ານ​ມາ ​ແລະ ການປະສານ​ສົມທົບຂອງສອງ​ຂະ​ແໜງການ ພ້ອມ​ທັງ​ປະກອບ​ຄໍາ​ເຫັນ​ໃສ່​ຮ່າງ​ບົດ​ບັນທຶກ​ສະບັບ​ປັບປຸງ​​ໃຫ້​ມີ​ເນື້ອ​ໃນ​ຄົບ​ຖ້ວນ​ຂຶ້ນຕື່ມ; ໂອກາດດັ່ງກ່າວ ສະຫາຍ ດຣ. ບຸນທອງ ຈິດມະນີ ​ໄດ້​ໂອ້​ລົມ​ຕໍ່​ກອງ​ປະຊຸມ ເຊິ່ງສະຫາຍໄດ້ຕີລາຄາສູງຕໍ່ການປະສານງານຂອງສອງອົງການໃນໄລຍະຜ່ານມາ ​ແລະ​ໄດ້​ຍ້ອງຍໍ​ຊົມ​ເຊີຍ​ຕໍ່​ພະນັກງານ​ທັງ​ສອງ​ອົງການ ທີ່​ໄດ້​ປະຕິບັດໜ້າ​ທີ່​ຢ່າງ​ທ່ຽງ​ທໍາ ​ແລະ ​ໄດ້​ຮັບ​ຜົນ​ສໍາ​ເລັດ​ຕາມ​ລະດັບ​ຄາດໝາຍ​ທີ່​ໄດ້​ວາງ​ໄວ້; ພ້ອມ​ທັງ​ໃຫ້​ທິດ​ຊີ້​ນໍາ​​ແກ່​ພະນັກງານ​ທັງ​ສອງ​ອົງການ ​ເປັນຕົ້ນພະນັກງານການ​ນໍາຫຼັກ​ແຫຼ່ງ ຈົ່ງ​ເອົາ​ໃຈ​ໃສ່​ຕື່ມ​ຕໍ່​ການ​ປະຕິບັດ​ໜ້າ​ທີ່​ຕາມ​ພາລະ​ບົດບາດ​ທີ່​ ພັກ-ລັດ ມອບ​ໝາຍ​ໃຫ້ ຢ່າງ​ມີ​ຄວາມ​ຊື່​ສັດ, ທ່ຽງ​ທໍາ, ​ເຂັ້ມງວດ​ຕາມ​ລະບຽບ​ກົດໝາຍ ​ໃຫ້​ສົ​ມກັບ​ວ່າ​ເປັນ​ອົງການ​ກວດ​ສອບ​ແຫ່ງ​ລັດ ​ແລະ ອົງ​ການ​ກວດກາ​ລັດຖະບານ​ທີ່​ແທ້​ຈິງ.

 
ຂະນະນີ້ທ່ານຢູ່ທີ່: ໜ້າ​ຫຼັກ ຂ່າວ​ ແລະ ເຫດ​ການ ກອງປະຊຸມປຶກສາຫາລືລະຫວ່່າງອົງການກວດກາລັດຖະບານ ແລະ ອົງການກວດສອບແຫ່ງລັດ ໃນວັນທີ 23 ພະຈິກ ປີ 2015