Welcome to SIA

    ພ້ອມກັນຕ້ານການສໍ້ລາດບັງຫຼວງທຸກຮູບແບບ

ສະຫາຍ ດຣ. ບຸນທອງ ຈິດມະນີ ໂອ້ລົມຕໍ່ກອງປະຊຸມວຽກງານກວດກາປະຈໍາປີ 2015 ກະຊວງກະສິກໍາ ແລະ ປ່າໄມ້

ອີເມລ ພິມ PDF

img 722  

ສະຫາຍ ດຣ. ບຸນທອງ ຈິດມະນີ ໂອ້ລົມຕໍ່ກອງປະຊຸມວຽກງານກວດກາປະຈໍາປີ 2015 ກະຊວງກະສິກໍາ ແລະ ປ່າໄມ້

ສະຫາຍ ດຣ. ບຸນທອງ ຈິດທະນີ ກໍາມະການກົມການເມືອງສູນກາງພັກ, ເລຂາທິການສູນກາງພັກ, ປະທານຄະນະກວດ ກາສູນກາງພັກ, ປະທານອົງການກວດກາລັດຖະບານ, ຫົວໜ້າອົງ ການຕ້ານການສໍ້ລາດບັງຫຼວງຂັ້ນສູນກາງ ໄດ້ໃຫ້ກຽດ ເປັນປະທານ ແລະ ໂອ້ລົມຕໍ່ພິທີປິດກອງປະຊຸມວຽກງານກວດກາປະຈໍາປີ 2015 ຂອງກະຊວງກະສິກໍາ ແລະ ປ່າໄມ້ ໃນ ວັນທີ 19 ກຸມພາ 2016 ທີ່ສະໂມສອນ ສະຖາບັນຄົ້ນຄວ້າກະສິກໍາ ແລະ ປ່າໄມ້ແຫ່ງຊາດ ມີ ສະຫາຍ ຄໍາໄຊ ອຸ່ນມີໄຊ ຮອງປະທານ ຄະນະກວດກາສູນກາງພັກ, ຫົວໜ້າກົມ, ຄະນະກົມຈາກຄະນະກວດກາສູນກາງພັກ, ອົງການກວດກາລັດ ຖະບານ, ສະຫາຍ ດຣ. ເພັດ ພົມພິພັກ ກໍາມະການສູນກາງພັກ, ເລຂາຄະນະພັກ, ລັດຖະມົນຕີວ່າການກະຊວງກະສິກໍາ ແລະ ປ່າໄມ້, ຫົວໜ້າກົມ, ຮອງກົມ, ຫົວໜ້າພະແນກການອ້ອມຂ້າງທີ່ກ່ຽວຂ້ອງກະຊວງກະສິກໍາ ແລະ ປ່າໄມ້ເຂົ້າຮ່ວມ ຈໍານວນ 130 ສະຫາຍ, ຍິງ 26 ສະຫາຍ.

ກອງປະຊຸມວຽກງານກວດກາປະຈໍາປີໄດ້ດໍາເນີນມາເປັນເວລາ 2 ວັນ ໄດ້ອັດລົງໃນວັນ 19 ກຸມພາ 2016 ດ້ວຍຜົນ ສໍາເລັດອັນຈົບງາມ ໂອກາດດັ່ງກ່າວ ສະຫາຍລັດຖະມົນຕີວ່າການກະຊວງກະສິກໍາ ແລະ ປ່າໄມ້ ກໍໄດ້ລາຍງານຜົນຂອງ ກອງປະຊຸມແມ່ນໄດ້ຜ່ານບົດສະຫຼຸບຕີລາຄາວຽກງານກວດກາຂະແໜງກະລິກໍາ ແລະ ປ່າໄມ້ ປະຈໍາປີ 2015 ແລະ ທິດທາງແຜນການ 2016 ແລະ ບົດສະຫຼູບຕີລາຄາວຽກງານກວດກາຂະແໜງກະສິກໍາ ແລະ ປ່າໄມ້ 5 ປີ (2011-2015) ແລະ ທິດທາງແຜນການ 5 ປີ 2016-2020, ທິດຊີ້ນໍາໃນບົດໂອ້ລົມຂອງ ສະຫາຍ ບຸນຍັງ ວໍລະຈິດ ເລຂາທິການໃຫຍ່ ສູນກາງພັກປະຊາຊົນປະຕິວັດລາວ ຕໍ່ກອງປະຊຸມວຽກງານກວດກາທົ່ວປະເທດ ຄັ້ງທີ 2, ທິດທາງວຽກງານກວດກາປີ 2016 ຂອງຄະນະກວດກາສູນກາງພັກ, ອົງການກວດກາລັດຖະບານ,ບົດແນະນໍາເລກທີ 307/ອກລ ລົງວັນທີ 30/9/2015 ວ່າດ້ວຍລະບຽບການຄຸ້ມຄອງ ແລະ ນໍາໃຊ້ເອກະສານແຈ້ງຊັບສິນ, ບົດບັນທຶກການປະສານລະຫວ່າງອົງການກວດກາລັດ ຖະບານ ແລະ ອົງການກວດສອບແຫ່ງລັດ, ເລົ່າມູນເຊື້ອວັນສ້າງຕັ້ງອົງການກວດກາລັດຖະບານ ຄົບຮອບ 34 ປີ(16/2/1982-16/2/2016) ແລະ ບັນດາບົດແນະນໍາຂອງອົງການກວດກາລັດຖະບານຈໍານວນໜຶ່ງ.

ໂອກາດດັ່ງກ່າວສະຫາຍ ດຣ. ບຸນທອງ ຈິດມະນີ ໄດ້ສະແດງຄວາມເຫັນດີເປັນເອກະພາບຕໍ່ກອງປະຊຸມ ແລະ ສະ ແດງຄວາມຍ້ອງຍໍຊົມເຊີຍຕໍ່ຜົນງານທີ່ຍາດມາໄດ້ນັ້ນແມ່ນຍ້ອນຄວາມເອົາໃຈໃສ່, ຄວາມເປັນເຈົ້າການຂອງຄະນະພັກ, ຄະ ນະນໍາ ແລະ ພະນັກງານຫຼັກແຫຼ່ງໃນການຈັດຕັ້ງປະຕິບັດວຽກງານກວດກາ ຄຽງຄູ່ກັບຜົນງານທີ່ຍາດມາໄດ້ກໍຍັງມີຂໍ້ຄົງຄ້າງ ເປັນຕົ້ນແມ່ນການຄົ້ນຄວ້າຫັນຍຸດທະສາດພັດທະນາດ້ານກະສິກໍາແລະ ປ່າໄມ້ຍັງມີລັກສະນະຊັກຊ້າ, ການຄຸ້ມຄອງ ແລະ ນໍາໃຊ້ລະບົບຊົນລະປະທານຍັງບໍ່ທັນໄດ້ດີ, ການຜະລິດກະສິກໍາບໍ່ທັນຫຼາກຫຼາຍ, ການຄຸ້ມຄອງການຜະລິດ, ປ່າປູກ, ການ ປູກ ແລະ ຟື້ນຟູປ່າບໍ່ທັນປະຕິບັດໄດ້ຢ່າງແຂງແຮງ ແລະ ທົ່ວເຖິງ, ທັດສະນະ ແລະ ຄວາມຮັບຮູ້ເຂົ້າໃຈຂອງພະນັກ ງານ-ສະມາຊິກພັກຈໍານວນໜຶ່ງຕໍ່ກັບວຽກງານກວດກາ, ຕໍ່ການສະກັດກັ້ນ ແລະ ຕ້ານການສໍ້ລາດບັງຫຼວງບໍ່ທັນເລິກເຊິ່ງແທ້, ການຕິດຕາມ-ກວດກາປົກກະຕິຢູ່ແຕ່ລະກົມກອງ, ສູນ, ສະຖາບັນ ແລະ ຮາກຖານພັກ ແມ່ນບໍ່ທັນເຮັດໄດ້ຢ່າງຕັ້ງໜ້າ, ຕໍ່ ເນື່ອງ ແລະ ອື່ນໆ. ເພື່ອແກ້ໄຂບັນດາຂໍ້ຄົງຄ້າງນັ້ນ ສະຫາຍ ດຣ. ບຸນທອງ ຈິດມະນີ ຍັງໄດ້ໃຫ້ທິດຊີ້ນໍາຕື່ມອີກເປັນຕົ້ນ ແມ່ນ: ສືບຕໍ່ພ້ອມກັນກໍາແໜ້ນ ແລະ ເປີດຂະບວນແຂ່ງຂັນສູ້ຊົນຈັດຕັ້ງປະຕິບັດບັນດາຄາດໝາຍກອງປະຊຸມໃຫຍ່ຄັ້ງທີ 10 ຂອງພັກເວົ້າລວມ, ເວົ້າສະເພາະແມ່ນບັນດາຄາດໝາຍດ້ານວຽກງານກະສິກໍາ ແລະ ປ່າໄມ້ ແລະ ບັນດາຈິດໃຈມະຕິ ກອງປະຊຸມໃຫຍ່ຄັ້ງທີ 5 ຂອງອົງຄະນະພັກ ກະຊວງກະສິກໍາ ແລະ ປ່າໄມ້; ເພີ່ມທະວີວຽກງານຄຸ້ມຄອງປ່າຜະລິດ, ປ່າ ປູກ, ປູກລະດົມ ແລະ ຊູກຍູ້ຂະບວນການປູກໄມ້ ( ທັງປູກ-ທັງປົກປັກຮັກສາ); ເພີ່ມທະວີການປະຕິບັດບົດບາດຄຸ້ມຄອງ ມະຫາພາກ ຂອງຂະແໜງກະສິກໍາ ແລະ ປ່າໄມ້ ດ້ວຍບາດກ້າວບຸກທະລຸທີ່ແຂງແຮງກວ່າເກົ່າ; ສືບຕໍ່ປັບປຸງ ແລະ ຂະຫຍາຍຕາໜ່າງສະຖານີ ຫຼື ສູນການຜະລິດແນວພັນ ລົງສູ່ຮາກຖານເຂດຫ່າງໄກສອກຫຼີກ, ສືບຕໍ່ຄົ້ນຄວ້າກໍາແໜ້ນ ແລະ ຈັດຕັ້ງປະຕິບັດມະຕິ 03 ຂອງກົມການເມືອງສູນກາງພັກ ວ່າດ້ວຍວຽກງານ 3 ສ້າງ; ທົບທວນຄືນຈິດໃຈເນື້ອໃນກອງປະ ຊຸມວຽກງານກວດກາທົ່ວປະເທດຄັ້ງທີ 2  ແລະ ບົດໂອລົມຂອງສະຫາຍເລຂາທິການໃຫຍ່ຕໍ່ກອງປະຊຸມດັ່ງກ່າວ, ສືບຕໍ່ຄົ້ນ ຄວ້າກໍາແໜ້ນມະຕິຂອງຄະນະບໍລິຫານງານສູນກາງພັກສະໄໝທີ 9 ວ່າດ້ວຍການເພີ່ມທະວີວຽກງານຕິດຕາມ-ກວດກາ, ສະ ກັດກັ້ນ ແລະ ຕ້ານການສໍ້ລາດບັງຫຼວງ ໃນເງື່ອນໄຂໃໝ່; ຄະນະພັກ, ຄະນະນໍາ ແລະ ພະນັກງານທຸກລະດັບຕ້ອງບຸກທະ ລຸດ້ານທັດສະນະ ແລະ ຄວາມຮັບຮູ້ຕໍ່ວຽກງານຕິດຕາມ, ກວດກາ, ວຽກງານສະກັດກັ້ນ ແລະ ຕ້ານການສໍ້ລາດ ບັງຫຼວງ ໃນເງື່ອນໄຂປັດຈຸບັນໃຫ້ຖືກຕ້ອງ ພ້ອມທັງເພີ່ມທະວີວຽກງານຕິດຕາມກວດກາ ຖືເປັນວຽກທີ່ສໍາຄັນຕົ້ນຕໍ; ດ້ານວຽກງານ ການສະກັດກັ້ນ ແລະ ຕ້ານການສໍ້ລາດບັງຫຼວງ ບັນຫາທີ່ຕ້ອງໄດ້ເອົາໃຈໃສ່ແມ່ນສຶກສາອົບຮົມພະນັກງານ, ສະມາຊິກພັກ ໃຫ້ເຫັນຜົນຮ້າຍ ແລະ ຄວາມອັນຕະລາຍຂອງການສໍ້ລາດບັງຫຼວງ ແລະ ອື່ນໆ;

 

 
ຂະນະນີ້ທ່ານຢູ່ທີ່: ໜ້າ​ຫຼັກ ຂ່າວ​ ແລະ ເຫດ​ການ ສະຫາຍ ດຣ. ບຸນທອງ ຈິດມະນີ ໂອ້ລົມຕໍ່ກອງປະຊຸມວຽກງານກວດກາປະຈໍາປີ 2015 ກະຊວງກະສິກໍາ ແລະ ປ່າໄມ້