Welcome to SIA

    ພ້ອມກັນຕ້ານການສໍ້ລາດບັງຫຼວງທຸກຮູບແບບ

ດຣ. ບຸນທອງ ຈິດມະນີ ເຂົ້າຮ່ວມກອງປະຊຸມວຽກງານກວດກາ ປະຈຳປີ 2012 ທີ່ ສາລະວັນ

ອີເມລ ພິມ PDF


visit saravan 2

visit saravan 1

visit saravan 3

ໃນລະຫວ່າງວັນທີ 27 ເມສາ ເຖິງ 01 ພຶດສະພາ 2013, ທ່ານ ດຣ. ບຸນທອງ ຈິດມະນີ ກຳມະການກົມ ການເມືອງສູນກາງພັກ, ເລຂາທິການສູນກາງພັກ, ປະທານຄະນະກວດກາສູນກາງພັກ ໄດ້ເດີນທາງໄປເຄື່ອນໄຫວ ແລະ ເຂົ້າຮ່ວມກອງປະຊຸມວຽກງານກວດກາທົ່ວແຂວງ ສາລະວັນ ປະຈຳປີ 2012 ຊຶ່ງໃຫ້ກຽດຕ້ອນຮັບ ໂດຍ ທ່ານ ຄຳບຸ່ນ ດ້ວງປັນຍາ ກຳມະການສູນກາງພັກ, ເລຂາພັກແຂວງ, ເຈົ້າແຂວງໆ ສາລະວັນ.

ກອງປະຊຸມກວດກາໃນຄັ້ງນີ້ມີບັນດາສະຫາຍຄະນະປະຈຳພັກແຂວງ, ເລຂາ​ຮອງເລຂາພັກເມືອງ, ປະທານ, ຮອງປະທານ ກວດກາເມືອງ, ພະແນກການພ້ອມດ້ວຍບັນດາພະນັກງານ, ວິຊາການເຂົ້າຮ່ວມກວ່າ 100 ສະຫາຍ. ໃນໂອກາດນີ້ ທ່ານ ດຣ. ບຸນທອງ ຈິດມະນີ ໄດ້ຮັບຟັງການລາຍງານກ່ຽວກັບການຈັດຕັ້ງປະຕິບັດວຽກງານກວດກາຕາມມະຕິກອງປະຊຸມໃຫຍ່ ຄັ້ງທີ VII ຂອງອົງຄະນະພັກແຂວງ ໃນໄລຍະເຄິ່ງສະໄໝ ແລະການຈັດຕັ້ງປະຕິບັດວຽກງານກວດກາປະຈຳປີ 2012 ພ້ອມທິດທາງແຜນການປີ 2013 ຈາກ ທ່ານ ວຽງທອງ ອິນລະແສງ ຮອງປະທານຄະນະກວດກາແຂວງ, ຈາກນັ້ນ ກອງປະຊຸມວຽກງານກວດກາຍັງໄດ້ເຜີຍແຜ່ບົດໂອ້ລົມຕໍ່ກອງປະຊຸມວຽກງານກວດກາປະຈຳປີ 2012 ຂອງ ສະຫາຍ ບຸນຍັງ ວໍລະຈິດ ຜູ້ປະຈຳການຄະນະເລຂາທິການສູນກາງພັກ, ບົດແນະນຳຂອງຄະນະກວດກາສູນກາງພັກສະບັບເລກທີ 548/ຄກສພ, ລົງວັນທີ 31/12/2012 ວ່າດ້ວຍການຈັດຕັ້ງປະຕິບັດຂໍ້ກຳນົດເລກທີ 03/ກມສພ, ລົງວັນທີ 26/6/2012 ວ່າດ້ວຍຄວາມຮັບຜິດຊອບຂອງພະນັກງານນຳພາ​ຄຸ້ມຄອງຕໍ່ການປະຕິບັດໜ້າທີ່ການເມືອງ ແລະ ຜ່ານບົດແນະນຳຂອງ ສູນກາງພັກສະບັບເລກທີ 549/ຄກສພ, ລົງວັນທີ 31/12/2012 ວ່າດ້ວຍການຈັດຕັ້ງປະຕິບັດຂໍ້ກຳນົດເລກທີ 02/ກມພສ, ລົງວັນທີ 26/06/2012 ວ່າດ້ວຍຂໍ້ຫ້າມສຳລັບສະມາຊິກພັກ, ດຳລັດວ່າດ້ວຍການຮັບຮອງ ແລະ ປະກາດໃຊ້ຍຸດທະສາດ ຕ້ານການສໍ້ລາດບັງຫຼວງຮອດປີ 2020. ນອກນີ້ບັນດາຜູ້ແທນທີ່ເຂົ້າຮ່ວມກອງປະຊຸມຍັງໄດ້ພ້ອມກັນປະກອບຄຳຄິດ​ຄຳເຫັນ ກ່ຽວກັບການຈັດຕັ້ງປະຕິບັດວຽກງານກວດກາທີ່ຕິດພັນກັບຂະແໜງການຂອງຕົນຢ່າງຕັ້ງໜ້າ. ພາຍຫຼັງບັນດາຜູ້ແທນໄດ້ ປະກອບຄຳເຫັນແລ້ວ ທ່ານ ດຣ. ບຸນທອງ ຈິດມະນີ ໄດ້ສະແດງຄວາມຍ້ອງຍໍຊົມເຊີຍຕໍ່ບັນດາສະຫາຍຜູ້ແທນ ໄດ້ພ້ອມກັນຄົ້ນຄວ້າ ແລະ ລາຍງານການປະຕິບັດວຽກງານກວດກາພັກ, ກວດກາລັດ, ສະກັດກັ້ນ ແລະ ຕ້ານການສໍ້ລາດ ບັງຫຼວງໃນພະແນກການ ແລະ ເມືອງຂອງຕົນຢ່າງກົງໄປກົງມາ ໂດຍຍົກໃຫ້ເຫັນດ້ານດີ, ດ້ານອ່ອນ ແລະ ຂໍ້ຄົງຄ້າງ ໃນການປະຕິບັດວຽກງານກວດກາ ແລະ ຕ້ານການສໍ້ລາດບັງຫຼວງໃນໄລຍະຜ່ານມາ. ນອກນີ້ທ່ານຍັງໄດ້ເນັ້ນໜັກບາງ ບັນຫາສຳຄັນ ເຊັ່ນ: ໃຫ້ສືບຕໍ່ຄົ້ນຄວ້າກຳແໜ້ນ ແລະ ຜັນຂະຫຍາຍຈັດຈັ້ງປະຕິບັດເນື້ອໃນກອງປະຊຸມວຽກງານກວດກາ ທົ່ວປະເທດ ຄັ້ງທີ II ລວມທັງບົດໂອ້ລົມຂອງສະຫາຍເລຂາທິການໃຫຍ່ຄະນະບໍລິຫານງານສູນກາງພັກ; ຄົ້ນຄວ້າເຊື່ອມຊຶມ ກຳແໜ້ນ ແລະ ຈັດຕັ້ງປະຕິບັດບັນດາມະຕິ, ຂໍ້ກຳນົດຂອງພັກ, ຂອງລັດກ່ຽວກັບວຽກງານຕິດຕາມ​ກວດກາລວມທັງ ບົດແນະນຳຕ່າງໆ ທີ່ໄດ້ປະກາດໃຊ້ແລ້ວນັ້ນໃຫ້ຖືກຕ້ອງ ແລະ ເກີດຜົນເປັນຈິງ, ຄະນະພັກ, ຄະນະນຳແຕ່ລະຂັ້ນ ແລະພະນັກງານສະມາຊິກພັກທຸກລະດັບຕ້ອງບຸກທະລຸທາງດ້ານທັດສະນະ ແລະ ຄວາມຮັບຮູ້ເຂົ້າໃຈຕໍ່ວຽກງານກວດກາ, ວຽກງານສະກັດກັ້ນ ແລະ ຕ້ານການສໍ້ລາດບັງຫຼວງໃນເງື່ອນໄຂປະຈຸບັນໃຫ້ຖືກຕ້ອງ ແລະ ຖືເອົາວຽກງານນີ້ເປັນວຽກງານ ໜຶ່ງທີ່ສຳຄັນ ແລະ ຂາດບໍ່ໄດ້ໃນການນຳພາຂອງພັກ ແລະ ການຄຸ້ມຄອງຂອງລັດ. ນອກນີ້ທ່ານຍັງໄດ້ລົງໄປຢ້ຽມຢາມ ອຳນາດ ການປົກຄອງ ແລະ ພໍ່ແມ່ປະຊາຊົນຢູ່ ເມືອງສະໜ້ວຍ ແລະ ບ້ານແສນວັງ, ເມືອງສາລະວັນ ຊຶ່ງແມ່ນບ້ານສາມສ້າງຕື່ມອີກ.

 
ຂະນະນີ້ທ່ານຢູ່ທີ່: ໜ້າ​ຫຼັກ ຂ່າວ​ ແລະ ເຫດ​ການ ດຣ. ບຸນທອງ ຈິດມະນີ ເຂົ້າຮ່ວມກອງປະຊຸມວຽກງານກວດກາ ປະຈຳປີ 2012 ທີ່ ສາລະວັນ