Welcome to SIA

    ພ້ອມກັນຕ້ານການສໍ້ລາດບັງຫຼວງທຸກຮູບແບບ

ຂ່າວ ແລະ ເຫດ​ການ​ລ່າ​ສຸດ

ຂ່າວ​າ​ສານ ແລະ ເຫດ​ການ​ລ່າ​ສຸດ​ຂອງ ອກ​ລ



ກອງປະຊຸມເຜີຍແຜ່, ຜັນຂະຫຍາຍເນື້ອໃນກອງປະຊຸມວຽກງານກວດກາທົ່ວປະເທດຄັ້ງທີ III

ອີເມລ ພິມ PDF
 img 7185
 

ກອງ​ປະຊຸມ​ເຜີຍ​ແຜ່, ຜັນ​ຂະຫຍາຍ​ເນື້ອ​ໃນ​ກອງ​ປະຊຸມ​ວຽກ​ງານ​ກວດກາ​ທົ່ວ​ປະ​ເທດ​ຄັ້ງທີ III

    ໃນ​ຕອນ​ບ່າຍວັນ​ທີ 5 ກັນຍາ 2016 ທີ່​ຜ່ານ​ມາ ກົມ​ກວດກາ​ກະຊວງ​ພາຍ​ໃນ ​ໄດ້​ຈັດ​ກອງ​ປະຊຸມ​ເຜີຍ​ແຜ່, ຜັນ​ຂະຫຍາຍ​ເນື້ອ​ໃນ​ກອງ​ປະຊຸມ​ວຽກ​ງານ​ກວດກາ​ທົ່ວ​ປະ​ເທດ​ຄັ້ງທີ III ​ໃຫ້​ສະມາຊິກ​ພັກ-ພະນັກງານ​ຜູ້​ເຮັ​ດວຽກ​ງານ​ກວດກາ​ທົ່ວ​ກະຊວງ​ພາຍ​ໃນ, ພາຍ​ໃຕ້​ການ​ເປັນ​ປະທານ ຂອງ​ສະຫາຍ ຄໍາ​ໝັ້ນ ສູນ​ວິ​ເລີດ ກໍາມະການ​ສູນ​ກາງ​ພັກ, ​ເລຂາ​ຄະນະ​ພັກ, ລັດຖະມົນຕີ​ກະຊວງ​ພາຍ​ໃນ, ມີ​ຄະນະ​ປະ​ຈໍາ​ພັກ​, ກຳມະການ​ຄະນະ​ພັກ​ກະຊວງ, ​ເລຂາໜ່ວຍ​ພັກ, ຫົວໜ້າ​ຫ້ອງການ, ບັນດາ​ກົມ, ສະ​ຖາ​ບັນ-ສູນ ​ແລະ​ຜພະນັກງານ​ຜູ້​ເຮັດວຽກງານ​ກວດກາທົ່ວ​ກະຊວງ​​ເຊິ່ງມີ​ຜູ້ເຂົ້າຮ່ວມ​ທັງ​ໝົດ 237 ສະຫາຍ.

    ກອງ​ປະຊຸມ​ໃນ​ຄັ້ງນີ້, ​ໄດ້​​ເຜີຍ​ແຜ່​ເອກະສານ​ຕ່າງໆ​ກ່ຽວກັບ​ວຽກງານ​ກວດກາ ​ເຊິ່ງ​ເປັນ​ເນື້ອ​ໃນ​ສໍາຄັນ​ຂອງ​ກອງ​ປະຊຸມ​ວຽກງານ​ກວດກາ​ທົ່ວ​ປະ​ເທດ​ຄັ້ງທີ III ​ປະກອບ​ມີ: ບົດ​ສະຫຼຸບວຽກງານກວດກາ​ແຕ່​ປີ 2011-2015 ​ແລະ ທິດ​ທາງ​ແຜນການ​ວຽກງານ​ກວດກາ​ແຕ່​ປີ 2016-2020 ຂອງ​ກະຊວງ​ພາຍ​ໃນ; ບົດ​ຄັດ​ຈ້ອນ​ການ​ເຄື່ອນ​ໄຫວວຽກງານ​ກວດກາ​ແຕ່​ປີ 2011-2015 ​ແລະ ທິດ​ທາງ​​ແຜນການ​ແຕ່​ປີ 2016-2020 ຂອງ​ຄະນະ​ກວດກາ​ສູນ​ກາງ​ພັກ; ບົດ​ໂອ້​ລົມ​ຂອງ ສະຫາຍ ບຸນ​ຍັງ ວໍລະ​ຈິດ ​ເລຂາທິການ​ໃຫຍ່​ຄະນະ​ບໍລິຫານ​ງານ​ສູນ​ກາງ​ພັກ, ປະທານ​ປະ​ເທດ​​ແຫ່ງ ສປປ ລາວ ຕໍ່ກອງ​ປະຊຸມ​ວຽກງານ​ກວດກາ​ທົ່ວ​ປະ​ເທ​ດຄັ້ງທີ III  ​ແລະ ບົດ​ແນະ​ນໍາ​ຂອງ​ຄະນະ​ກວດກາ​ສູນ​ກາງ​ພັກ​ສະບັບ ​ເລກທີ 259/ຄກສພ, ລົງ​ວັນ​ທີ 27 ມິຖຸນາ 2016 ວ່າ​ດ້ວຍ​ການຈັດຕັ້ງກົດ​ລະບຽບຂອງ​ພັກ ສະ​ໄໝທີ X ກ່ຽວກັບ​ວຽກງານ​ຕິດຕາມ, ກວດກາ​ຂອງ​ພັກ ​ແລະ ຄະນະ​ກວດກາ​ພັກ​ແຕ່ລະ​ຂັ້ນ.

    ໃນ​​ໂອກາດ​ດັ່ງກ່າວ​ນີ້, ສະຫາຍ ຄໍາ​ໝັ້ນ ສູນ​ວິ​ເລີດ ​ໄດ້​ໃຫ້ກຽດມີ​ຄໍາ​ເຫັນ​ໂອ້​ລົມ​ຕໍ່ກອງ​ປະຊຸມ, ​ໂດຍ​ສະຫາຍ ​ໄດ້​ເນັ້ນໜັກ​ໃຫ້​ບັນດາສະຫາຍຄະ​ນະ​ພັກ-ຄະນະ​ນໍາ​ກະຊວງ​ຕະຫຼອດຮອດ​ສະມາຊິກ​ພັກ-ພະນັກງານທົ່ວ​ກະຊວງ​ຈົ່ງ​ນໍາ​ເອົາ​ເນື້ອ​ໃນ​ກອງ​ປະຊຸມ​ໃນ​ຄັ້ງນີ້, ​ໂດຍ​ສະ​ເພາະ​ແມ່ນ​ທິດ​ທາງແຜນການວຽກງານກວດກາແຕ່ນີ້ຮອດປີ 202​0ໄປຜັນຂະຫຍາຍແລະ ພ້ອມກັນຈັດຕັ້ງປະຕິບັດເຂົ້າໃນໜ້າທີ່ວຽກງານທີ່ຕົນຮັບຜິດຊອບໃຫ້ໄດ້ຮັບຜົນສໍາເລັດແລະ ມີປະສິດທິຜົນສູງ.

 

ກອງປະຊຸມວຽກງານກວດກາທົ່ວນະຄອນຫຼວງວຽງຈັນຄັ້ງທີ II

ອີເມລ ພິມ PDF

 img 7118

 img 7132

    ກອງປະຊຸມວຽກງານກວດກາທົ່ວນະຄອນຫຼວງວຽງຈັນຄັ້ງທີ II

    1-2 ກັນຍາ 2016 ພະແນກກວດການະຄອນຫຼວງວຽງຈັນໄດ້ ຈັດຕັ້ງກອງປະຊຸມວຽກງານກວດກາທົ່ວນະຄອນຫຼວງວຽງຈັນຄັ້ງທີ II ຂຶ້ນທີ່ຫ້ອງວ່າການປົກຄອງນະຄອນຫຼວງວຽງຈັນ ພາຍໃຕ້ການເປັນປະທານຮ່ວມຂອງສະຫາຍ ປອ. ອານຸພາບ ຕຸນາລົມ ກໍາມະການສູນກາງພັກ, ຮອງເລຂາພັກ, ປະທານ​ສະພາ​ປະຊາຊົນນະຄອນຫຼວງວຽງຈັນ, ​ເປັນກຽດ​ເຂົ້າ​ຮ່ວມ​ຂອງ​ສະຫາຍ ປອ. ສິນ​ລະ​ວົງ ຄຸດ​ໄພທູນ ກຳ​ມະ​ການ​ກົມ​ການ​ເມືອງ​ສູນ​ກາງ​ພັກ, ​ເລຂາ​ຄະນະ​ພັກ, ​ເຈົ້າ​ຄອງ​ນະຄອນຫຼວງວຽງຈັນ, ສະຫາຍ ດາວບົວລະພາ ບາວົງເພັດ ຮອງປະທານຄະນະກວດກາສູນກາງພັກ, ຮອງປະທານອົງການກວດກາລັດຖະບານ, ຮອງ​ຫົວໜ້າ​ອົງການ​ຕ້ານ​ການ​ສໍ້​ລາດ​ບັງຫຼວງສູນ​ກາງ,  ສະຫາຍ  ລາດຊະນີວົງ ອະມະຣະທິທາດາ ປະທານກວດກາພັກ-ຫົວໜ້າ​ພະ​ແນ​ກກວດກາລັດນະຄອນຫຼວງວຽງຈັນ, ສະຫາຍ ແກ້ວພິລາວັນ ອາໄພລາດ ຮອງເຈົ້າຄອງນະຄອນຫຼວງວຽງຈັນ ແລະ ສະຫາຍ ບຸນທອງ ພົມມະຈັນ ຫົວໜ້າຄະນະຈັດຕັ້ງນະຄອນຫຼວງວຽງຈັນ, ມີຄະນະປະຈໍາພັກ, ຄະນະພັກ, ຄະນະພັກຮາກຖານ, ເລຂາໜ່ວຍພັກເອກະລາດ ອ້ອມຂ້າງນະຄອນຫຼວງວຽງຈັນ ແລະ ພະນັກງານກວດກາຂອງພະແນກກວດການະຄອນຫຼວງວຽງຈັນເຂົ້າຮ່ວມຈໍານວນ 157 ສະຫາຍ, ຍິງ 27 ສະຫາຍ.

    ໃນກອງປະຊຸມຄັ້ງນີ້, ສະຫາຍ ລາດຊະນີວົງ ອະມະຣະທິທາດາ ໄດ້ສະເໜີຜ່ານບົດສະຫຼຸບຕີລາຄາການເຄື່ອນໄຫວວຽກງານຕິດຕາມ-ກວດກາ ແລະ ສະກັດກັ້ນ-ຕ້ານການສໍ້ລາດບັງຫຼວງໃນໄລຍະ 5 ປີຜ່ານມາ (2011-2015), ທິດທາງແຜນການແຕ່ປີ 2016-2020. ເຊິ່ງໄລຍະ 5 ປີຜ່ານມາ ຄະນະພັກ-ຄະນະ​ນໍາ ອົງການປົກຄອງ ​ແລະ ຄະນະກວດກາແຕ່ລະຂັ້ນໄດ້ສຸມໃສ່ຈັດຕັ້ງປະຕິບັດວຽກງານກວດກາຕາມພາລະບົດບາດ, ໜ້າທີ່, ຂອບເຂດສິດຂອງຕົນ ໄດ້ເຮັດໃຫ້ວຽກງານກວດກາປະກອບສ່ວນສໍາຄັນເຂົ້າໃນການປົກປັກຮັກສາສະຖຽນລະພາບທາງດ້ານການເມືອງ, ເສດຖະກິດ, ວັດທະນະທໍາ-ສັງຄົມ ແລະ ບັນດາຂົງເຂດວຽກງານຂະແໜງການຕ່າງໆໄດ້ມີການຂະຫຍາຍຕົວ, ພະນັກງານສະມາຊິກພັກມີຄວາມໜັກແໜ້ນທາງດ້ານການເມືອງແນວຄິດ, ປະກອບສ່ວນເຂົ້າໃນການສ້າງພັກໃຫ້ມີຄວາມປອດໃສ-ເຂັ້ມແຂງທາງດ້ານການຈັດຕັ້ງ ແລະ ສະກັດກັ້ນ-ຕ້ານການສໍ້ລາດບັງຫຼວງໃນທຸກຮູບແບບ.

    ຕອນທ້າຍກອງປະຊຸມໄດ້ຮັບກຽດໂອ້ລົມຕໍ່ກອງປະຊຸມໂດຍສະຫາຍ ປອ. ສິນລະວົງ ຄຸດໄພທູນ ກໍາມະການກົມການເມືອງສູນກາງພັກ, ເລຂາຄະນະພັກ, ເຈົ້າຄອງນະຄອນຫຼວງວຽງຈັນ ເຊິ່ງກ່ອນອື່ນສະຫາຍ​ໄດ້ສະແດງຄວາມຍ້ອງຍໍຊົມເຊີຍຕໍ່ຜົນງານອັນຍິ່ງໃຫຍ່ທີ່ບັນດາສະຫາຍທີ່ຍາດມາໄດ້ ແລະ ເພື່ອສືບຕໍ່ຮັກສາມູນເຊື້ອ ແລະ ເສີມຂະຫຍາຍໃຫ້ວຽກງານກວດກາໄດ້ຮັບການປະຕິບັດຢ່າງມີປະສິດທິພາບ ແລະ ປະສິດທິຜົນນັ້ນ ຮຽກຮ້ອງໃຫ້ບັນດາຄະນະພັກ, ອົງການປົກຄອງ ແລະ ຄະນະກວດກາແຕ່ລະຂັ້ນເອົາໃຈໃສ່ໂຄສະນາເຜີຍແຜ່ ແລະ ເຊື່ອມຊຶມເນື້ອໃນກອງປະຊຸມວຽກງານກວດກາທົ່ວປະເທດຄັ້ງທີ III ແລະ ກໍາແໜ້ນເນື້ອໃນຈິດໃຈຄໍາຄິດຄໍາເຫັນຂອງສະຫາຍເລຂາທິການໃຫຍ່, ປະທານປະເທດ ແລະ ທິດທາງໜ້າທີ່ວຽກງານກວດກາໄລຍະໃໝ່ ຢ່າງຮອບດ້ານ ແລະ ເລິກເຊິ່ງ.

 

 

 

ຄະນະຜູ້ແທນຂັ້ນສູງຄະນະຈັດຕັ້ງສູນກາງພັກກອມມູນິດຫວຽດນາມ ຢ້ຽມຢາມຄະນະກວດກາສູນກາງພັກແຫ່ງ ສປປ ລາວ

ອີເມລ ພິມ PDF

ຄະນະຜູ້ແທນຂັ້ນສູງຄະນະຈັດຕັ້ງສູນກາງພັກກອມມູນິດຫວຽດນາມ

ຢ້ຽມຢາມຄະນະກວດກາສູນກາງພັກແຫ່ງ ສປປ ລາວ

img 7050

   ຕອນແລງວັນທີ 29 ສິງຫາ 2016 ໄດ້ມີພິທີພົບປະແລກປ່ຽນບົດຮຽນລະຫວ່າງ ຄະນະກວດກາສູນກາພັກປະຊາຊົນປະຕິວັດລາວ ກັບ ຄະນະຈັດຕັ້ງສູນກາງພັກກອມມູນິດຫວຽດນາມ, ຢູ່ຫ້ອງປະຊຸມ ຄະນະກວດກາສູນກາງພັກ ທີ່ ນະຄອນຫຼວງວຽງຈັນ, ຝ່າຍລາວນໍາໂດຍ ສະຫາຍ ປອ. ບຸນທອງ ຈິດມະນີ ກໍາມະການກົມການເມືອງສູນກາງພັກ, ເລຂາທິການສູນກາງພັກ, ຮອງນາຍົກລັດຖະມົນຕີ, ປະທານຄະນະກວດກາສູນກາງພັກປະຊາຊົນປະຕິວັດລາວ ພ້ອມຄະນະ, ຝ່າຍ ສສ ຫວຽດນາມ ນໍາໂດຍ ສະຫາຍ ຟາມ ມິງ ຈິ້ງ ກໍາມະການກົມການເມືອງສູນກາງພັກ, ເລຂາທິການສູນກາງພັກ, ຫົວໜ້າຄະນະຈັດຕັ້ງສູນກາງພັກກອມມູນິດຫວຽດນາມ ພ້ອມດ້ວຍຄະນະ.
   ໂອກາດດັ່ງກ່າວ, ສະຫາຍ ປອ. ບຸນທອງ ຈິດມະນີ ປະທານຄະນະກວດກາສູນກາງພັກປະຊາຊົນປະຕິວັດລາວ ໄດ້ກ່າວຕ້ອນຮັບຄະນະຜູ້ແທນຂັ້ນສູງພ້ອມທັງຕີລາຄາສູງການມາຢ້ຽມຢາມ ແລະ ເຮັດວຽກແມ່ນມີຄວາມໝາຍສໍາຄັນເປັນຢ່າງຍິ່ງເປັນການປະ ກອບສ່ວນອັນສໍາຄັນເຂົ້າໃນການເພີ່ມພູນຄູນສ້າງສາຍພົວພັນມິດຕະພາບ, ຄວາມສາມັກຄີພິເສດ ແລະ ການຮ່ວມມືຮອບດ້ານ ລະຫວ່າງສອງພັກ, ສອງລັດ ແລະ ປະຊາຊົນສອງຊາດ ລາວ-ຫວຽດນາມ ໃຫ້ຈະເລີນງອກງາມຍິ່ງໆຂຶ້ນ ເວົ້າລວມ, ເວົ້າສະເພາະໃນການພົວພັນຮ່ວມມືຊ່ວຍເຫຼືອຊຶ່ງກັນ ແລະ ກັນລະຫວ່າງຄະນະກວດກາສູນກາງພັກລາວ ກັບ ຄະນະຈັດຕັ້ງສູນກາງພັກຫວຽດ ນາມ ໃຫ້ໄດ້ຮັບການເສີມຂະຫຍາຍ ແລະ ການມາຢ້ຽມຢາມເຮັດວຽກຄັ້ງນີ້ ທັງສອງຝ່າຍໄດ້ເນັ້ນໃສ່ວຽກງານບາງວຽກງານຄື: ໜຶ່ງ: ກ່ຽວກັບການຈັດຕັ້ງ ແລະ ການເຄື່ອນໄຫວຂອງຄະນະກວດກາສູນກາງພັກ, ອົງການກວດກາລັດຖະບານ; ສອງ: ກ່ຽວກັບການປະຕິບັດສິດຂອງປະທານຄະນະກວດກາພັກຄວບຕໍາແໜ່ງເປັນປະທານອົງການກວດກາລັດຢູ່ແຕ່ລະຂັ້ນມີຂໍ້ສະດວກ, ຂໍ້ຫຍຸງຍາກ ແລະ ມີບົດຮຽນໃນການປະຕິບັດຜ່ານມາ; ສາມ: ການເຄື່ອນໄຫວຕິດຕາມກວດກາພັກ ແລະ ສະກັດກັ້ນ ແລະ ຕ້ານການສໍ້ລາດບັງຫຼວງ. ນອກຈາກນີ້, ທັງສອງຝ່າຍກໍໄດ້ແລກປ່ຽນຄໍາຄິດເຫັນກ່ຽວກັບບັນຫາທີ່ຕ່າງຝ່າຍໃຫ້ຄວາມສົນໃຈ. ເພື່ອຖອດຖອນເປັນບົດຮຽນໃນການປັບປຸງແບບແຜນນໍາພາຂອງພັກໃຫ້ນັບມື້ມີຄວາມໜັກແໜ້ນເຂັ້ມແຂງ ແລະ ເພີ່ມທະວີວຽກງານກວດກາຂອງພັກ, ກວດກາລັດໃຫ້ດີຂຶ້ນ.
   ໃນໂອກາດມາຢ້ຽມຢາມແລກປ່ຽນບົດ ຢູ່ ສປປ ລາວ ຄັ້ງນີ້, ຄະນະຜູ້ແທນ ຄະນະຈັດຕັ້ງສູນກາງພັກກອມມູນິດຫວຽດນາມຈະໄດ້ເຂົ້າຢ້ຽມຂໍ່ານັບການນໍາພັກ-ລັດ ແລະ ຢ້ຽມຊົມຫໍພິພິທະພັນ ປະທານ ໄກສອນ ພົມວິຫານ, ຢ້ຽມຊົມສະຖານທີ່ສໍາຄັນຄັນຕ່າງໆທີ່ນະຄອນຫຼວງວຽງຈັນ. ນອກຈາກນີ້, ຍັງໄດ້ໄປຢ້ຽມຢາມເຮັດວຽກຢູ່ແຂວງ ຫຼວງພະບາງອີກດ້ວຍ. ຄະນະຜູ້ແທນຂັ້ນສູງຄະນະຈັດຕັ້ງສູນກາງພັກກອມມູນິດຫວຽດນາມຈະໄດ້ຢ້ຽມຢາມເຄື່ອນໄຫວແລກປ່ຽນບົດຮຽນຢູ່ ສປປ ລາວ ແຕ່ວັນທີ 28 ສິງຫາ - 1 ກັນຍາ 2016 ຈຶ່ງຈະສໍາເລັດ.
 
 

ສະຫາຍ ປອ. ບຸນທອງ ຈິດມະນີ ລົງເຄື່ອນໄຫວຢ້ຽມຢາມ ແລະ ເຮັດວຽກຢູ່ແຂວງໄຊຍະບູລີ

ອີເມລ ພິມ PDF

ສະຫາຍ ປອ. ບຸນ​ທອງ ຈິດ​ມະນີ

ລົງເຄື່ອນໄຫວຢ້ຽມຢາມ ແລະເຮັດວຽກຢູ່​ແຂວງ​ໄຊຍະບູລີ

14060256 955129551262895 1823830563 o

14060372 955136977928819 1622553590 o

    ໃນວັນທີ 18 ສິງຫາ 2016 ສະຫາຍ ປອ. ບຸນທອງ ຈິດມະນີ ກຳມະການກົມການເມືອງສູນກາງພັກ, ເລຂາທິການສູນກາງພັກ, ຮອງນາຍົກລັດຖະມົນຕີແຫ່ງ ສປປ ລາວ, ປະທານຄະນະກວດກາສູນກາງພັກ, ປະທານອົງການກວດກາລັດຖະບານແລະ ຫົວໜ້າອົງການຕ້ານການສໍ້ລາດບັງຫຼວງຂັ້ນສູນກາງ ພ້ອມ​ຄະນະ ໄດ້ລົງພົບ​ປະເຄື່ອນໄຫວເຮັດວຽກຢູ່​​ແຂວງ​ໄຊ​ຍະ​ບູລີ, ເຊິ່ງສະຫາຍ ພົງ​ສະຫວັນ ສິດ​ທະ​ວົງ ກຳ​ມະ​ການ​ສູນ​ກາງ​ພັກ, ເລຂາພັກແຂວງ, ​ເຈົ້າແຂວງໆ​ໄຊ​ຍະ​ບູລີ ພ້ອມດ້ວຍຄະນະປະຈຳພັກແຂວງ, ປະທານ​, ຮອງປະທານກວດກາ, ຫົວໜ້າຂະແໜງການແລະ ພະນັກງານຫຼັກແຫຼ່ງທົ່ວ​ແຂວງໄດ້ໃຫ້ການຕ້ອນຮັບຢ່າງສົມກຽດ.
    ໃນໂອກາດນີ້, ສະຫາຍ ພົງ​ສະຫວັນ ສິດ​ທະ​ວົງ ​ກຳມະການ​ສູນ​ກາງ​ພັກ, ເລຂາ​ພັກ​ແຂວງ, ​ເຈົ້າ​ແຂວງໆ​ໄຊ​ຍະ​ບູລີໄດ້ລາຍງານຫຍໍ້​ການຈັດ​ຕັ້ງປະຕິບັດ​​ແຜນ​ພັດທະນາ​ເສດຖະກິດ​-ສັງຄົມ ໄລຍະທ້າຍປີ 2015 ຫາຕົ້ນປີ 2016 ຜ່ານ​ມາ ແລະ ທິດ​ທາງ​ແຜນ​ສູ້​ຊົນແຕ່ໄລຍະນີ້ຮອດ ປີ 2017 ໂດຍ​ສະ​ເພາະ​ແມ່ນສະພາບການຈັດຕັ້ງຜັນຂະຫຍາຍມະຕິກອງປະຊຸມໃຫຍ່ຄັ້ງທີ VI ຂອງອົງຄະນະພັກແຂວງ ​ແລະ ມະຕິ​ກອງ​ປະຊຸມ​ໃຫຍ່​ຄັ້ງທີ X ຂອງ​ພັກ, ສະພາບ​ລວມຂອງແຂວງ ກ່ຽວກັບວຽກ​ງານປ້ອງກັນຊາ-ປ້ອງກັນຄວາມສະຫງົບ, ​ແຜນພັດທະນາເສດຖະກິດ​-ສັງຄົມ, ​​ເຊິ່ງໄດ້​ຍົກ​ໃຫ້ເຫັນ​ການ​ເຕີບ​ໃຫຍ່​ຂະຫຍາຍຕົວ​ຂອງ​ຂົງ​ເຂດ​ເສດຖະກິດ, ​ໄລຍະຜ່ານມາແຂວງ​ໄຊ​ຍະ​ບູລີແມ່ນສາມາດຮັກສາ​​ໄດ້ຄວາມສະຫງົບໂດຍພື້ນຖານ, ​ເສດຖະກິດມີການຂະຫຍາຍຕົວຢ່າງຕໍ່ເນື່ອງ ແລະ ໝັ້ນທ່ຽງ, ​ເຊິ່ງເຮັດໃຫ້ຊີວິດການເປັນຢູ່ຂອງພະນັກງານ, ທະຫານ, ຕຳຫຼວດແລະ ພໍ່ແມ່ປະຊາຊົນບັນດາ​​ເຜົ່າໃນທົ່ວແຂວງໄດ້ຮັບການຍົກລະດັບຂຶ້ນເປັນກ້າວໆ, ​ໃນ​ໄລຍະ 10 ເດືອນ​ຕົ້ນປີ 2015-ຕົ້ນປີ2016 ລວມຍອດ​ຜະລິດ​ຕະພັນ​ພາຍ​ໃນ GDP 7.900 ຕື້​ກີບ, ​ເສດຖະກິດ​ຂະຫຍາຍຕົວ​ໃນ​ລະດັບ 9% ສະ​ເລ່ຍລາຍ​ຮັບປະຊາຊົນ 20.160.000ກີບເທົ່າກັບ 2.520​ ​ໂດລາ/ຄົນ/ປີ, ອັດຕາເຂົ້າຮຽນສຸດທິຊັ້ນປະຖົມບັນລຸ 99,8% , ທົ່ວ​ແຂວງ​ຍັງ​ມີຄອບຄົວທຸກຍາກຍັງເຫຼືອ 1.687, ກວມເອົາ 2,28%.
    ຈາກ​ນັ້ນ, ສະຫາຍ ປອ. ບຸນທອງ ຈິດມະນີ ໄດ້ຕີລາຄາສູງຕໍ່ຜົນງານທີ່ຄະນະພັກແຂວງກໍ່ຄືປະຊາຊົນຍາດມາໄດ້ ພ້ອມດຽວກັນນັ້ນ, ສະຫາຍຍັງໄດ້ເນັ້ນໜັກໃຫ້ຄະນະ​ພັກ-ຄະນະ​ນໍາ​ແຂວງ​ໄຊ​ຍະ​ບູລີ ເອົາໃຈໃສ່ໃນວຽກ​ງານການປ້ອງກັນຊາ-ປ້ອງກັນຄວາມສະຫງົບເພາະ ວ່າ​​ອິດທິກຳລັງປໍລະປັກຍັງ​​ສືບຕໍ່ກຳສະພາບພາຍໃນຂອງພວກເຮົາ ເພື່ອສ້າງເງື່ອນໄຂສ້າງຄວາມແຕກແຍກຢູ່ພາຍໃນເຊິ່ງມາດຕະການແກ້ໄຂອັນສຳຄັນແມ່ນ​ໃຫ້​ຖື​ການ​ຫັນ​ລົງ​ຮາກ​ຖານ-ການກໍ່ສ້າງຮາກຖານ, ການປັບປຸງກຳລັງໃຫ້ມີຄວາມເຂັ້ມແຂງ, ການສ້າງສະຕິເປັນເຈົ້າ ຂອງປະຊາຊົນຕໍ່ສະພາບປະກົດການຫຍໍ້ທໍ້ຕ່າງໆສຳລັບການພັດທະນເສດຖະກິດ-ສັງຄົມແມ່ນ​​ສືບຕໍ່ເຜີຍແຜ່ເຊື່ອມຊຶມໃຫ້ປະຊາຊົນກຳແໜ້ນ​​ເນື້ອໃນຈິດໃຈ, ຄາດໝາຍຂອງມະຕິ​ກອງ​ປະຊຸມ​ໃຫຍ່​ຄັ້ງທີ X ຂອງ​ພັກ ​ແລະ ມະຕິ​ກອງ​ປະຊຸມ​ຄັ້ງທີ VI ຂອງອົງຄະນະພັແຂວງຜັນຂະຫຍາຍໃຫ້ເປັນອັນລະອຽດຂອງບັນດາຂະແໜງການ.
    ໃນຕອນບ່າຍຂອງວັນດຽວກັນ ສະຫາຍ ປອ. ບຸນທອງ ຈິດມະນີ ພ້ອມຄະນະ​​, ​ໄດ້ພົບປະໂອ້ລົມເຮັດວຽກກັບພະນັກງານ​​ກວດກາ​​ແຂວງແລະເມືອງ. ​​​ໂດຍສະຫາຍ ດວງ​ຕາ ​ໄຊ​ວຸດ ຄະນະປະຈໍາພັກແຂວງ, ປະທານຄະນະກວດກາພັກແຂວງ ຫົວໜ້າພະ​ແນ​ກກວດກາ​ລັດ, ​ໄດ້ລາຍງານສະພາບໂດຍຫຍໍ້​​ກ່ຽວກັບການເຄື່ອນໄຫວວຽກງານກວດກາພັກ, ກວດກາລັດແລະການສະກັດກັ້ນ-ຕ້ານການສໍ້ລາດບັງຫຼວງ​​ໃນໄລຍະຜ່ານມາ,​ ​ໂອກາດນີ້, ​ສະຫາຍ ປອ. ບຸນທອງ ຈິດມະນີໄດ້ຕີລາຄາສູງຕໍ່ກັບຜົນງານທີ່ຍາດມາໄດ້ແລະຊີ້ນໍາບາງບັນຫາ ກ່ຽວກັບ ວຽກງານກວດກາຕື່ມອີກ. ພ້ອມນີ້, ຍັງໄດ້ໄດ້ມອບຄອມພິວເຕີ້ຈໍານວນ 09ຊຸດໃຫ້ຄະນະກວດກາພັກແຂວງ​ໄຊ​ຍະບູລີເພື່ອນໍາໃຊ້ເຂົ້າໃນການປະຕິບັດວຽກງານວິຊາສະເພາະ​​ໃຫ້ມີປະສິດທິຜົນດີຂຶ້ນກວ່າເກົ່າ.
 

ສະຫາຍ ປອ. ບຸນທອງ ຈິດມະນີ ລົງເຄື່ອນໄຫວຢ້ຽມຢາມ ແລະ ເຮັດວຽກຢູ່ແຂວງບໍ່ແກ້ວ

ອີເມລ ພິມ PDF

ສະຫາຍ ປອ. ບຸນ​ທອງ ຈິດ​ມະນີ

ລົງເຄື່ອນໄຫວຢ້ຽມຢາມ ແລະເຮັດວຽກຢູ່​ແຂວງບໍ່​ແກ້ວ

14059944 954454697997047 842798153 o

14012374 954473924661791 576656429 o

 
    ໃນວັນທີ 17 ສິງຫາ 2016 ສະຫາຍ ປອ. ບຸນທອງ ຈິດມະນີ  ກຳມະການກົມການເມືອງສູນກາງພັກ, ເລຂາທິການສູນກາງພັກ, ຮອງນາຍົກລັດຖະມົນຕີແຫ່ງ ສປປ ລາວປະທານຄະນະກວດກາສູນກາງພັກປະທານອົງການກວດກາລັດຖະບານ  ​ແລະ ຫົວໜ້າອົງການຕ້ານການສໍ້ລາດບັງຫຼວງຂັ້ນສູນກາງ ພ້ອມ​ຄະນະ ໄດ້ລົງເຄື່ອນໄຫວເຮັດວຽກຢູ່​​ແຂວງບໍ່​ແກ້ວ, ເຊິ່ງສະຫາຍ ຄໍາ​ພັນ ​ເຜີຍ​ຍະ​ວົງ ກຳ​ມະ​ການ​ສູນ​ກາງ​ພັກ, ເລຂາພັກແຂວງ, ​ເຈົ້າແຂວງໆບໍ່ແກ້ວ ພ້ອມດ້ວຍຄະນະປະຈຳພັກແຂວງ, ປະທານ​, ຮອງປະທານກວດກາ, ຫົວໜ້າຂະແໜງການແລະ ພະນັກງານຫຼັກແຫຼ່ງທົ່ວ​ແຂວງໄດ້ໃຫ້ການຕ້ອນຮັບຢ່າງສົມກຽດ.
    ໃນໂອກາດນີ້, ສະຫາຍ ຄໍ​າພັນ ​ເຜີຍ​ຍະ​ວົງ ​ກຳມະການ​ສູນ​ກາງ​ພັກ, ເລຂາ​ພັກ​ແຂວງ, ​ເຈົ້າ​ແຂວງໆບໍ່​ແກ້ວໄດ້ລາຍງານສະພາບການຈັດຕັ້ງຜັນຂະຫຍາຍມະຕິກອງປະຊຸມໃຫຍ່ຄັ້ງທີ V ຂອງອົງຄະນະພັກແຂວງ ​ແລະ ສະພາບ​ລວມຂອງແຂວງ ກ່ຽວກັບວຽກ​ງານປ້ອງກັນຊາ-ປ້ອງກັນຄວາມສະຫງົບ, ​ແຜນພັດທະນາເສດຖະກິດ​-ສັງຄົມ 5ປີ ຄັ້ງ​ທີ VIII ຂອງ​ແຂວງ, ​​ເຊິ່ງໄດ້​ຍົກ​ໃຫ້​ເຫັນ​ການເຕີບໃຫຍ່​ຂະຫຍາຍຕົວ​ຂອງ​ຂົງ​ເຂດ​ເສດຖະກິດ,​ ໃນຕະຫຼອດ ໄລຍະທີ່ຜ່ານມາແຂວງບໍ່​ແກ້ວແມ່ນສາມາດຮັກສາ​​ໄດ້ຄວາມສະຫງົບໂດຍພື້ນຖານ, ​ເສດຖະກິດມີການຂະຫຍາຍຕົວຢ່າງຕໍ່ເນື່ອງ ແລະ ໝັ້ນທ່ຽງ, ​ເຊິ່ງເຮັດໃຫ້ຊີວິດການເປັນຢູ່ຂອງພະນັກງານທະຫານຕຳຫຼວດ ແລະ ພໍ່ແມ່ປະຊາຊົນບັນດາ​​ເຜົ່າພາຍໃນແຂວງດີຂຶ້ນເປັນກ້າວໆ, ​ໃນ​ໄລຍະ 9​ ເດືອນ​ຕົ້ນປີ 2015-2016 ລວມຍອດ​ຜະລິດ​ຕະພັນ​ພາຍ​ໃນ GDP ບັນລຸ​ໄດ້ 83,95%, ​ເສດຖະກິດ​ຂະຫຍາຍຕົວສະເລ່ຍ​ໃນ​ລະດັບ 9,6% ປະຊາຊົນມີລາຍໄດ້1.492​ໂດລາ/ຄົນ/ປີ, ຄອບ ຄົວທຸກຍາກຍັງເຫຼືອ 11,24% ຂອງຄອບຄົວທັງໝົດໃນແຂວງ.
    ຈາກ​ນັ້ນ, ສະຫາຍ ປອ. ບຸນທອງ ຈິດມະນີ ໄດ້ຕີລາຄາສູງຕໍ່ຜົນງານທີ່ຄະນະພັກແຂວງກໍ່ຄືປະຊາຊົນຍາດມາໄດ້ພ້ອມດຽວກັນນັ້ນ, ສະຫາຍຍັງໄດ້ເນັ້ນໜັກໃຫ້ຄະນະ​ພັກ-ຄະນະ​ນໍາ​ແຂວງບໍ່​ແກ້ວ ເອົາໃຈໃສ່ໃນວຽກ​ງານການປ້ອງກັນຊາ-ປ້ອງກັນຄວາມສະຫງົບເພາະວ່າຍຸດທະສາດຂອງອິດທິກຳລັງປໍລະປັກຍັງ​​ສືບຕໍ່ກຳສະພາບພາຍໃນຂອງພວກເຮົາ ເພື່ອສ້າງເງື່ອນໄຂສ້າງຄວາມແຕກແຍກຢູ່ພາຍໃນ​​ອັນສຳຄັນແມ່ນໄດ້ເອົາໃຈກໍ່ສ້າງຮາກຖານ,ປັບປຸງກຳລັງໃຫ້ມີຄວາມເຂັ້ມແຂງ, ​ສະຕິເປັນເຈົ້າຂອງປະຊາຊົນ; ສຳລັບການພັດທະນເສດຖະກິດ-ສັງຄົມແມ່ນ​​ສືບຕໍ່ເຜີຍແຜ່ເຊື່ອມຊຶມໃຫ້ປະຊາຊົນກຳແໜ້ນກ່ຽວກັບເນື້ອໃນຈິດໃຈ, ຄາດໝາຍໃນມະຕິ​ກອງ​ປະຊຸມ​ໃຫຍ່​ຂອງ​ພັກ​ຄັ້ງທີ X, ​ແຜນ​ພັດທະນາ​ເສດຖະກິດ​-ສັງຄົມ 5 ປີ ຄັ້ງທີ VIII ແລະ ມະຕິກອງປະຊຸມໃຫຍ່ອົງຄະນະພັແຂວງ, ການຜັນຂະຫຍາຍໃຫ້ເປັນອັນລະອຽດຂອງບັນດາຂະແໜງການ.
    ໃນຕອນບ່າຍຂອງວັນດຽວກັນ ສະຫາຍ ປອ. ບຸນທອງ ຈິດມະນີ ພ້ອມຄະນະ​​, ​ໄດ້ພົບປະໂອ້ລົມເຮັດວຽກກັບພະນັກງານ​​ກວດກາ​​ແຂວງແລະເມືອງ. ​​​ໂດຍສະຫາຍ ຈັນເພັງເກີດກອງ ຄະນະປະຈໍາພັກແຂວງ, ປະທານຄະນະກວດກາພັກແຂວງ, ​ໄດ້ລາຍງານສະພາບໂດຍຫຍໍ້​​ກ່ຽວກັບການຈັດຕັ້ງປະຕິບັດວຽກງານກວດກາພັກ, ກວດກາລັດແລະ ການສະກັດກັ້ນ-ຕ້ານການສໍ້ລາດບັງຫຼວງ​​ໃນໄລຍະຜ່ານມາ,​ ​ໂອກາດນີ້, ​ສະຫາຍ ປອ. ບຸນທອງ ຈິດມະນີໄດ້ຕີລາຄາສູງຕໍ່ກັບຜົນງານທີ່ຍາດມາໄດ້, ພ້ອມທັງໄດ້ຊີ້ນໍາວຽກງານກວດກາບາງດ້ານຕື່ມອີກແລະໄດ້ມອບຄອມພິວເຕີ້ຈໍານວນ 0ຊຸດໃຫ້ຄະນະກວດກາພັກແຂວງບໍ່ແກ້ວເພື່ອນໍາໃຊ້ເຂົ້າໃນການປະຕິບັດວຽກງານ ວິຊາສະເພາະ​​ໃຫ້ມີຄວາມສະດວກອີກດ້ວຍ. ຫຼັງຈາກນັ້ນ, ສະຫາຍ ຮອງນາຍົກລັດຖະມົນຕີ ພ້ອມຄະນະໄດ້ລົງເຄື່ອນໄຫວ ເຮັດວຽກຢູ່ເຂດເສດຖະກິດພິເສດສາມຫຼຽມທອງຄໍາອີກດ້ວຍ.
 
ໜ້າທີ 2 ​ຂອງທັງ​ໝົດ 7 ໜ້າ
ຂະນະນີ້ທ່ານຢູ່ທີ່: ໜ້າ​ຫຼັກ ຂ່າວ​ ແລະ ເຫດ​ການ