Welcome to SIA

    ພ້ອມກັນຕ້ານການສໍ້ລາດບັງຫຼວງທຸກຮູບແບບ

ປະ​ຫວັດການ​ສ້າງ​ຕັ້ງ ອກ​ລ

ອີເມລ ພິມ PDF

ໃນໄລຍະປີ 1920 - 1930 ປະທານ ໂຮ່ຈ່ີມິນ ໃນຖານະເປັນສະມາຊິກສາກົນທີ III ຮັບຜິດຊອບພາກຕາເວັນອອກ ໄດ້ນຳເອົາລັດທິມາກ-ເລນິນ ເຂົ້າມາໂຄສະນາເຜີຍແຜ່ ແລະ ສຶກສາອົບຮົມ ຖັນແຖວ ກຳມະກອນ, ຊາວຜູ້ອອກແຮງງານ ຢູ່ບັນດາ ປະເທດອິນດູຈີນ; ປຸກລະດົມຂົນຂວາຍເຕົ້າໂຮມກຳລັງປະຕິວັດກ້າວໄປເຖິງການສ້າງຕັ້ງ ພັກຄອມມູນິດອິນດູ ຈີນໃນປີ 1930.  ສະເພາະຢູ່ລາວ, ຜ່ານການກໍ່ສ້າງ ແລະ ເຕົ້າໂຮມກຳລັງປະຕິວັດມາຮອດ ວັນທີ 06/04/1934 ຄະນະ ພັກແຄວ້ນລາວໄດ້ຮັບການສ້າງຕັ້ງຂຶ້ນຢູ່ ດອນຊຽງຊູ້ ເຊິ່ງມີສະມາຊິກພັກຄອມມູນິດ 32 ສະຫາຍ, ມີ 6 ໜ່ວຍພັກ. ມາຮອດກອງປະຊຸມໃຫຍ່ຂອງພັກຄອມມູນິດອິນດູຈີນຄັ້ງທີ II ເດືອນ 02/1951 ໄດ້ຕົກລົງໃຫ້ນັກຄອມມູນິດແຕ່ລະປະ ເທດຈັດຕັ້ງພັກການເມືອງສະເພາະຂອງແຕ່ລະປະເທດ. ດັ່ງນັ້ນ, ອີງໃສ່ການຂະຫຍາຍຕົວທາງດ້ານ ຈຳນວນ ແລະ ຄຸນນະພາບຂອງການຈັດຕັ້ງພັກ ແລະ ສະມາຊິກພັກທີ່ຂຶ້ນກັບຄະນະພັກແຄວ້ນລາວ, ພັກປະຊາຊົນລາວ (ພັກປະຊາຊົນ ປະຕິວັດລາວ ໃນ ປັດຈຸບັນ) ຈຶ່ງໄດ້ຮັບການສ້າງຕັ້ງຂຶ້ນໃນວັນທີ 22/03/1955.

ສຳລັບວຽກງານກວດກາພັກແມ່ນ ໄດ້ຕິດພັນກັບການເຄື່ອນໄຫວນຳພາຂອງພັກ, ມີພັກແມ່ນມີການກວດກາ, ເຊິ່ງພັກໄດ້ ຢືນຢັນວ່າ: "ມີການນຳ ພາຕ້ອງມີການກວດກາ, ຖ້າບໍ່ມີການກວດກາກໍ່ບໍ່ມີການນຳພາ".

ໃນປະຫວັດແຫ່ງການຂະຫຍາຍຕົວຂອງສັງຄົມມະນຸດ,  ເວລາໃດກໍ່ໄດ້ມີການດຳເນີນການກວດກາການເຄື່ອນໄຫວຂອງຊົນ ຊັ້ນ, ຊັ້ນຄົນ ແລະ ບຸກຄົນ ໂດຍນຳໃຊ້ອົງການກວດກາສະເພາະ ຫຼື ນຳໃຊ້ທັງໝົດລະບົບການຈັດຕັ້ງຂອງສັງຄົມ. ຈຸດປະສົງດ້ານສັງຄົມຂອງການກວດກາແມ່ນ ເພື່ອເກັບກຳຂ່າວກ່ຽວກັບບັນດາຂະບວນການຢູ່ໃນສັງຄົມ ແລະ ບັນດາຂອດ ການຈັດຕັ້ງຂອງສັງຄົມ, ສັງລວມ ແລະ ສົມທຽບແຫຼ່ງຂ່າວຕ່າງໆທີ່ເກັບກຳໄດ້ກັບການເຄື່ອນໄຫວຂອງສັງຄົມ, ສົມທຽບ ຈຸດປະສົງທີ່ໄດ້ວາງໄວ້, ສົມທຽບໃສ່ບັນດາມາດຖານທາງດ້ານກົດໝາຍ, ຮີດຄອງປະເພນີ. ການກວດກາເປັນພາຫະນະ ເພື່ອຊອກຫາສາເຫດທີ່ພາໃຫ້ເກີດຈຸດອ່ອນ ແລະ ການລ່ວງລະເມີດລະບຽບຫຼັກການ ເພື່ອວາງວິທີການລົບລ້າງຈຸດອ່ອນ ເຫຼົ່ານັ້ນ ແລະ ສະກັດກັ້ນ ບໍ່ໃຫ້ເກີດອີກ.

ຈຸດປະສົງຂອງການກວດກາແມ່ນຕິດແໜ້ນກັບເງື່ອນໄຂປະຫວັດສາດ. ໃນສັງຄົມທີ່ມີຊົນຊັ້ນ, ພາລະບົດບາດຂອງການ ກວດກາກໍ່ມີລັກສະນະຊົນຊັ້ນເຊິ່ງເລນິນໄດ້ຂຽນວ່າ: "ບັນຫາທັງໝົດຂອງການກວດກາແມ່ນຢູ່ບ່ອນວ່າໃຜກວດກາໃຜ, ໝາຍ ຄວາມວ່າຊົນຊັ້ນໃດເປັນຊົນຊັ້ນກວດກາ ແລະ ຊົນຊັ້ນໃດເປັນຊົນຊັ້ນຖືກກວດກາ". ຕາມທິດສະດີມາກ-ເລນິນ, ການກວດກາແມ່ນລະບົບສາຍໃຍອັນກວ້າງຂວາງແຫ່ງບັນດາສະຖາບັນຂອງລັດ ເຊິ່ງໃນນັ້ນປະກອບດ້ວຍ: ບັນດາລະບົບ ການນຳພາທາງດ້ານການເມືອງ, ການຄຸ້ມຄອງຂອງລັດ, ການຈັດຕັ້ງຂອງສັງຄົມ ແລະ ອື່ນໆ. ການກວດກາມີ ຄວາມສຳຄັນອັນໃຫຍ່ຫຼວງ ໃນລະບົບການຄຸ້ມຄອງບັນດາຂະບວນວິວັດຂອງສັງຄົມເວົ້າລວມ, ແຕ່ຄວາມສຳຄັນຍິ່ງເພີ້ມ ທະວີຂຶ້ນເມື່ອສ້າງຕັ້ງອຳນາດການປົກຄອງເປັນຂອງປະຊາຊົນ,  ມາຈາກປະຊາຊົນ ແລະ ເພື່ອຜົນປະໂຫຍດຂອງ ປະຊາ ຊົນ. ອີງໃສ່ຄວາມສຳຄັນຂອງວຽກງານກວດກາດັ່ງກ່າວ, ນັບແຕ່ໄດ້ສ້າງຕັ້ງພັກປະຊາຊົນ ປະຕິວັດລາວ ກໍ່ໄດ້ມີການເຮັດ ວຽກງານກວດກາພາຍໃນພັກ.

ກ່ອນການສ້າງຕັ້ງອົງການກວດກາພັກ-ລັດ, ໂດຍສະເພາະແຕ່ກອງປະຊຸມໃຫຍ່ຄັ້ງທີ II ຂອງພັກ, ຢູ່ພາຍໃນພັກໄດ້ຈັດຕັ້ງ ຄະນະກວດກາຂອງພັກ ເຊິ່ງໃນກົດລະບຽບຂອງພັກສະໄໝທີ II ຢູ່ໝວດທີ 5 ມາດຕາ 26 ໄດ້ລະບຸວ່າ: ກອງປະຊຸມ ຄະນະບໍລິຫານງານສູນກາງເລືອກຕັ້ງກົມການເມືອງ, ເລືອກຕັ້ງຄະນະເລຂາ, ເລືອກຕັ້ງເລຂາທິການໃຫຍ່ ແລະ ເລືອກຕັ້ງ ຄະນະກວດກາສູນກາງ; ຢູ່ໝວດທີ 6, ມາດຕາ 28 ໄດ້ກຳນົດວ່າ: ຄະນະບໍລິຫານງານສູນກາງ, ແຂວງ ແລະ ກຳແພງເມືອງ ເລືອກເອົາກຳມະການຈຳນວນໜຶ່ງ ມາຈັດຕັ້ງເປັນຄະນະກວດກາຂອງຂັ້ນຕົນ. ອາດຈະເລືອກເອົາພະນັກງານຢູ່ນອກຄະນະ ບໍລິຫານງານພັກເຂົ້າຮ່ວມໃນຄະນະກວດກາກໍ່ໄດ້.  ຢູ່ໃນຂັ້ນເມືອງຕ້ອງແບ່ງໃຫ້ກຳມະການຜູ້ໜຶ່ງ ຮັບຜິດຊອບວຽກງານ ກວດກາ. ຢູ່ຂັ້ນພື້ນຖານຕ້ອງແບ່ງໃຫ້ກຳມະການຜູ້ໜຶ່ງ ເພື່ອຕິດຕາມການປະຕິບັດວິໄນຕໍ່ສະມາຊິກພັກ. ໜ້າທີ່ຂອງຄະນະ ກວດກາດັ່ງກ່າວແມ່ນ:

  • ກວດກາປະຊາທິປະໄຕ ແລະ ລະບຽບວິໄນຂອງພັກ, ກວດກາເບິ່ງສະມາຊິກພັກປະຕິບັດແນວທາງ ນະໂຍບາຍຂອງ ພັກ ແລະ ກົດໝາຍຂອງການປົກຄອງ, ກວດກາຄຸນສົມບັດຂອງສະມາຊິກພັກ.
  • ພິຈາລະນາຕົກລົງຮູບການປະຕິບັດວິໄນຕໍ່ສະມາຊິກພັກທີ່ມີຄວາມຜິດ, ພິຈາລະນາຄຳຮ້ອງຂໍຕໍ່ວ່າຂອງສະມາຊິກພັກ, ພິຈາລະນາ ຫຼື ລົບລ້າງຄະດີທີ່ຈະປະຕິບັດໃສ່ຜູ້ທີ່ເຮັດຜິດລະບຽບວິໄນຢູ່ໃນຂອບເຂດຂອງ ສິດອຳນາດທີ່ໄດ້ຮັບ ມອບໝາຍໂດຍໄດ້ຮັບຄຳອະນຸມັດ ຈາກຄະນະບໍລິຫານງານພັກຂັ້ນຕົນ.

ຫຼັງຈາກສະຖາປະນາ ສປປ ລາວ ໃນວັນທີ 02/ 12/ 1975, ພັກໄດ້ກາຍເປັນພັກກຳອຳນາດນຳພາຮອບດ້ານໃນທົ່ວສັງຄົມ ແລະ ທຸກຂົງເຂດວຽກງານ, ພັກໄດ້ອອກເຄື່ອນໄຫວນຳພາເປີດເຜີຍ, ຂອບເຂດການເຄື່ອນໄຫວຂອງພັກ ແລະ ລັດໄດ້ເປີດ ກວ້າງອອກ. ຈາກສະພາບດັ່ງກ່າວ, ມັນໄດ້ຮຽກຮ້ອງໃຫ້ມີການດັດແປງປັບປຸງວຽກງານກວດກາເຮັດໃຫ້ການກວດກາ ກວມລວມເອົາທັງໝົດຂອບເຂດການເຄື່ອນໄຫວນຳພາຂອງພັກ ແລະ ການຄຸ້ມຄອງຂອງລັດ. ການຈັດຕັ້ງທີ່ເຄື່ອນໄຫວ ກວດກາກວມເອົາທັງໝົດ ຄືດັ່ງກ່າວນັ້ນໄດ້ກາຍເປັນຄວາມຮຽກຮ້ອງຕ້ອງການ, ເປັນໜ້າທີ່ອັນໜຶ່ງທີ່ຕ້ອງໄດ້ຈັດຕັ້ງ ແລະ ປັບປຸງບູລະນະ.

ອີງໃສ່ຄວາມຮຽກຮ້ອງຕ້ອງການດັ່ງກ່າວ, ມະຕິກອງປະຊຸມຄົບຄະນະບໍລິຫານງານສູນກາງພັກຄັ້ງທີ 8 ສະໄໝທີ II ໃນປີ 1980 ໄດ້ກຳນົດວ່າ: "ຕ້ອງຈັດຕັ້ງຄະນະກວດກາຂຶ້ນທັນທີເພື່ອຊ່ວຍສູນກາງພັກ, ລັດຖະບານ ແລະ ສະພາປະຊາຊົນ ສູງສຸດໃນການກວດກາການປະຕິບັດກົດໝາຍ, ຂໍ້ກຳນົດຕ່າງໆຂອງລັດ". ຕໍ່ມາໃນເອກະສານກອງປະຊຸມໃຫຍ່ຄັ້ງທີ III ຂອງພັກປະຊາຊົນປະຕິວັດລາວໄດ້ກຳນົດວ່າ: "ການກວດກາແມ່ນພາລະບົດບາດຕົ້ນຕໍອັນໜຶ່ງຂອງຄະນະພັກຂັ້ນຕ່າງໆ, ບໍ່ມີການກວດກາກໍ່ໝາຍຄວາມວ່າບໍ່ມີການນຳພານັ້ນເອງ. ດຳເນີນການກວດກາແມ່ນເພື່ອເພີ່ມທະວີຄວາມສັກສິດຂອງການ ຊີ້ນຳ, ຮັບປະກັນໃຫ້ຂໍ້ຕົກລົງຕ່າງໆໄດ້ຮັບການປະຕິບັດ". ບົນພື້ນຖານທັດສະນະ ແລະ ຈິດໃຈຊີ້ນຳດັ່ງກ່າວ, ສູນກາງ ພັກປະຊາຊົນປະຕິວັດລາວ,  ຄະນະປະຈຳສະພາປະຊາຊົນສູງສຸດ ແລະ ສະພາລັດຖະມົນຕີໄດ້ອອກດຳ ລັດຮ່ວມກັນ ສະບັບເລກທີ 02, ລົງວັນທີ 16/02/1982 ວ່າດ້ວຍການເພີ່ມທະວີການກວດກາ ແລະ ກວດການການປະຕິບັດ ມະຕິຄຳສັ່ງຂອງພັກ ແລະ ລັດຖະບານໃນດຳລັດໄດ້ລະບຸວ່າ: ສ້າງຕັ້ງຄະນະກຳມະການກວດກາພັກ-ລັດ ຂອງສູນກາງພັກ ປະຊາ ຊົນປະຕິວັດລາວ ແລະ ສະພາລັດຖະມົນຕີ ສປປ ລາວ, ສ້າງຕັ້ງຄະນະກຳມະການກວດກາພັກ ແລະ ລັດຂອງ ແຂວງ, ຈັດຕັ້ງໜ່ວຍຊ່ວຍກວດກາພັກ ແລະ ລັດປະຈຳຄະນະກຳມະການປົກຄອງເມືອງ, ຈັດຕັ້ງໜ່ວຍຊ່ວຍກວດກາຢູ່ ໂຮງຈັກ, ໂຮງງານ, ສະຫະກອນແລະສຳນັກງານອົງການ.  ບັນດາການຈັດຕັ້ງດັ່ງກ່າວປະກອບເຂົ້າກັນເປັນລະບົບອົງການ ກວດກາພັກ ແລະ ລັດອັນໜຶ່ງອັນດຽວຂອງ ສປປ ລາວ.

ຫຼັງຈາກໄດ້ຮັບການສ້າງຕັ້ງໃນປີ 1982 ມາເຖິງ ປະຈຸບັນ, ກົງຈັກການຈັດຕັ້ງຄະນະກຳມະການກວດກາພັກ-ລັດ ໄດ້ມີການ ປັບປຸງໃຫ້ສອດຄ່ອງກັບສະພາບການຂະຫຍາຍຕົວຂອງກົງຈັກພັກ-ລັດ, ຂອງເສດຖະກິດ-ສັງມ ແລະ ຕາມສະໄໝກອງ ປະຊຸມໃຫຍ່ຂອງພັກ. ການເຄື່ອນໄຫວດຳເນີນການກວດກາແມ່ນກວດກາທັງດ້ານພັກ  ແລະ ດ້ານລັດ.

1. ໄລຍະປີ 1982-1986 (ສະໄໝກອງປະຊຸມໃຫຍ່ຄັ້ງທີ III ຂອງພັກ).

ວັນທີ 16/02/1982, ອົງການກວດກາໄດ້ຮັບການສ້າງຕັ້ງຂຶ້ນ. ສະເພາະຢູ່ຂັ້ນສູນກາງເອີ້ນວ່າ: ຄະນະກຳມະການກວດກາ ພັກ ແລະ ລັດຂອງສູນກາງພັກປະຊາຊົນປະຕິວັດລາວ ແລະ ສະພາລັດຖະມົນຕີ ສປປ ລາວ.

  • ໂຄງປະກອບຄະນະນຳຂອງຄະນະກຳມະການກວດກາພັກ ແລະ ລັດ ຂອງສູນກາງພັກປະຊາ ຊົນປະຕິວັດລາວ ແລະ ສະພາລັດຖະມົນຕີ ສປປ ລາວ ມີປະທານ 1 ສະຫາຍ ແລະ ຮອງປະທານ 3 ສະຫາຍໂດຍແມ່ນສະຫາຍ ໄມຈັນຕານ ແສງມະນີ ເລຂາທິການສູນກາງພັກເປັນປະທານ; ສະຫາຍ ນາງ ລຸນ ຈັກສຸວັນ ກຳມະການສູນກາງພັກ, ສະຫາຍ ຄຳຜຸຍ ແກ້ວບົວລະພາ ແລະ ສະຫາຍ ກອງສີ ຄະຕິຍະລາດ ເປັນຮອງປະທານ. ຄະນະກຳມະການກວດ ກາພັກ ແລະ ລັດນີ້ ໄດ້ຮັບການບົ່ງຕົວ ແຕ່ງຕັ້ງຈາກສູນກາງພັກ ແລະ ສະພາລັດຖະມົນຕີ.
  • ກົງຈັກຊ່ວຍວຽກຂອງຄະນະກຳມະການກວດກາພັກ ແລະ ລັດສູນກາງໄລຍະນີ້ມີ  7  ກົມ ແລະ 2 ຫ້ອງການຄື: ຫ້ອງການຂອງຄະນະ, ຫ້ອງການຮັບຈົດໝາຍ-ຄຳຮ້ອງທຸກ ແລະ ຄຳສະເໜີ, ກົມຄຸ້ມຄອງບໍລິຫານ, ກົມຈັດຕັ້ງ, ກົມກວດກາຂົງເຂດການຜະລິດ, ກົມກວດກາຂົງເຂດແຈກຢາຍຈໍລະຈອນ,ກົມກວດກາຂົງເຂດວັດທະນະທຳ, ສຶກສາ, ສາທາລະນະສຸກ,  ກິລາ ແລະ ສະຫວັດດີການ,  ກົມກວດກາພາຍໃນພັກ, ກົມກວດກາກຳລັງປະກອບອາວຸດ.

  • ໄລຍະນີ້ ກົງຈັກຄະນະກຳມະການກວດກາພັກ ແລະ ລັດ ຂັ້ນແຂວງ ແລະ ຂັ້ນເມືອງກໍ່ໄດ້ສ້າງ ຕັ້ງຂຶ້ນຢູ່ບາງແຂວງ ແລະ ເມືອງຈຳນວນໜຶ່ງ. ໃນໄລຍະນີ້, ຄະນະກຳມະການກວດກາພັກ ແລະ ລັດ, ໄດ້ດຳເນີນການກວດກາທັງດ້ານພັກ ແລະ ດ້ານລັດ ເຊິ່ງໄດ້ກວດກາການນຳພາຮອບດ້ານຂອງຄະນະໜ່ວຍພັກຢູ່ 66 ໜ່ວຍພັກ ແລະ ກວດກາຂົງເຂດ ເສດຖະກິດ-ສັງຄົມ 148 ບ່ອນ.

2. ໄລຍະປີ 1986-1991 (ສະ​ໄໝ​ກອງ​ປະຊຸມ​ໃຫຍ່​ຄັ້ງທີ IV ຂອງ​ພັກ).

ໄລຍະ​ປີ 1987 ຫາ 1988 ​ໄດ້ໂຮມການຈັດຕັ້ງຂອງ​ຄະນະ​ຈັດຕັ້ງສູນ​ກາງກັບຄະນະກຳມະການ ກວດກາ​ພັກ​ ​ແລະ ລັດສູນ​ກາງ ເຂົ້າ​ເປັນ​ກົງຈັກອັນ​ດຽວ, ​ເອີ້ນວ່າ​ກະຊວງ​ຈັດຕັ້ງ​​ ​ ກວດກາ, ຮອດ​ປີ 1989 ໄດ້​ແຍກ​ອອກ​ເປັນ​ສອງ​ອົງການ​​ຄື​​ເມື່ອ​ກ່ອນ.

  • ໂຄງ​ປະກອບ​ ຄະນະ​ນຳ​ຂອງຄະນະ​ກຳມະ ການ​ກວດກາ​ພັກ​ ​ແລະ ລັດສູນ​ກາງມີ​ ປະທານ 1 ສະຫາຍ, ຮອງ​ປະທານ 2 ສະຫາຍໂດຍ​ແມ່ນ​ສະຫາຍ ໄມ​ຈັນ​ຕານ ​ແສງ​ມະນີ ກຳມະການ​ກົມ​ການ​ເມືອງ, ເລຂາທິການສູນ​ກາງ​ພັກ ເປັນປະທານ; ສະຫາຍ ນາງ​ລຸນ ຈັກສຸ​ວັນ ກຳມະການ​ສູນ​ກາງ​ພັກ ແລະ ສະຫາຍ ອຸ່ນ​ຫຼ້າ ​ໄຊ​ຍະ​ສານ, ກຳມະການ​ສູນ​ກາງ​ພັກ ​ເປັນ​ຮອງ​ປະທານ; ມາ​ຮອດທ້າຍ​ປີ 1989  ກົມ​ການ​ເມືອງ​ສູນ​ກາງ​ພັກ ​ໄດ້​ແຕ່ງຕັ້ງ ສະຫາຍ​ ແຫວນ​ທອງ ຫຼວງ​ວິ​ໄລ ​ແລະ ສະຫາຍ ສຽວສະຫວາດ ສະ​ແຫວ​ງສຶກສາ ​ເປັນ​ຮອງ​ປະທານ​.
  • ກົງຈັກ​ຊ່ວຍ​ວຽກ​ ຂອງຄະນະ​ກຳມະການ​ກວດກາ​ພັກ​ ​ແລະ ລັດ ຢູ່​ຂັ້ນສູນ​ກາງແມ່ນ​ໄດ້ລົບລ້າງກົມ ແລະ ຈັດເປັນກຸ່ມ ວຽກໂດຍແມ່ນຮອງປະທານຮັບຜິດຊອບຊີ້ນຳໂດຍກົງ.
  • ໄດ້​ສ້າງຕັ້ງ ຄະນະ​ກຳມະການ​ກວດກາ​ພັກ​ແລະ ລັດ ຂັ້ນ​ແຂວງຢູ່ 11 ແຂວງ, ຂັ້ນ​ເມືອງຢູ່ 23 ເມືອງ; ໜ່ວຍ​ຊ່ວຍ​ກວດກາ​ຢູ່​ໂຮງງານ ແລະ ທຸລະ​ກິດ 23 ໜ່ວຍ, ຢູ່​ສະຫະກອນ​ກະ​ເສດ 8 ໜ່ວຍ, ຢູ່​ສຳນັກງານ​ອົງການ 26 ໜ່ວຍ. ໃນໄລຍະນີ້, ຄະນະ​ກຳມະການ​ກວດກາ​ພັກ​ ແລະ ລັດ​ໄດ້​ດຳ​ເນີນ​ການ​ກວດກາ​ທັງ​ດ້ານ​ພັກ​ ແລະ ດ້ານ ລັດເຊິ່ງໄດ້​ກວດກາ​ພັກ​ທັງ​ໝົດ 1.042 ໜ່ວຍພັກ, ສະມາຊິກ​ໄດ້​ຮັບ​ການ​ກວດກາ 20.108 ສະຫາຍ, ຜ່ານ​ການ​ກວດກາ​ໄດ້​ປະຕິບັດວິ​ໄນ​ຫຼາຍ​ລະດັບ​ຕໍ່ສະມາຊິກ​ພັກ​ 197 ຄົນ. ດ້ານ​ເສດຖະກິດ​ໄດ້​ກວດກາ​ຢູ່ 382 ການຈັດຕັ້ງຮາກ​ຖານການຜະລິດ.

3. ໄລຍະປີ 1991-1996 (ສະ​ໄໝ​ກອງ​ປະຊຸມ​ໃຫຍ່​ຄັ້ງທີ V ຂອງ​ພັກ).

  • ການຈັດຕັ້ງຄະນະກວດກາຢູ່ຂັ້ນສູນກາງເອີ້ນວ່າ: ຄະນະກຳມະການກວດກາສູນ​ກາງພັກເຊິ່ງຄະນະ​ນຳຂອງ ຄະນະ​ກຳມະການ​ກວດກາສູນ​ກາງ​ພັກ​​​ປະກອບມີ​ປະທານ 1 ສະຫາຍ, ຮອງ​ປະທານ 1 ສະຫາຍ, ກຳມະການ​ 7 ສະຫາຍ  ໂດຍ​ແມ່ນສະຫາຍ ​ໄມ​ຈັນ​ຕານ ​ແສງມະນີ ກຳມະການ​ກົມ​ການ​ເມືອງ​ສູນ​ກາງ​ພັກ ​ເປັນ​ປະທານ,  ສະຫາຍ ນາງ​ ດາວອນ ວົງ​ສັກ ກຳມະການ​ສຳຮອງສູນ​ກາງ​ພັກ ​ເປັນ​ຮອງ​ປະທານ (​ໄລຍະ​ປີ 1991-1994)​ ຕໍ່ມາສະຫາຍ ນາງ ດາວອນ ວົງສັກ ຍົກຍ້າຍໄປຮັບໜ້າທີ່ບ່ອນໃໝ່ ແລະ ສະຫາຍ ຄຳ​ໝັ້ນ ສູນ​ວິ​ເລີດ ກຳມະການ​ສູນ​ກາງ​ພັກ  ມາ​ເປັນ​ຮອງ​ປະທານ (ໄລຍະ​ປີ 1994​-​1996); ສະຫາຍ ​ແຫວນ​ທອງ ຫຼວງ​ວິ​ໄລ, ສະຫາຍ ສຽວສະຫວາດ ສະ​ແຫວ​ງສຶກສາ, ສະຫາຍ ວົງເພັດ ໄຊເກີຢາຈົງຕົວ ກຳມະການສູນ ກາງພັກ ຮອງປະທານສະພາແຫ່ງຊາດຊຸດທີ 4, ສະຫາຍ ພົນຈັດຕະວາ ສຸດໃຈ ທຳມະສິດ ຮອງລັດຖະມົນຕີກະຊວງພາຍໃນ, ສະຫາຍ ພົນຈັດຕະວາ ສະໄຫວ ໄຊຍະເສນາ ຫົວໜ້າກົມກວດກາກອງທັບ, ສະຫາຍ ຢາວ ພອນວັນທາ ຮອງລັດຖະມົນຕີກະ ຊວງການເງິນ ແລະ ສະຫາຍ ໜູພອນ ເຂັມມະໄລ ຫົວໜ້າກົມຂອງຫ້ອງວ່າການສູນກາງພັກເປັນ​ກຳມະການ​.
  • ກົງຈັກ​ຊ່ວຍ​ວຽກ​ຂອງຄະນະ​ກຳມະການກວດກາສູນ​ກາງ​ພັກ​ໄລຍະ​ນີ້ມີ 2 ກົມ ​ແລະ 1 ຫ້ອງ​ການ​ຄື:  ກົມ​ກວດກາພັກ ອ້ອມຂ້າງ,  ກົມ​ກວດກາ​ພັກ​ທ້ອງ​ຖິ່ນ, ຫ້ອງ​ການ​ຂອງ​ຄະນະ.
  • ລະບົບ​ການຈັດຕັ້ງຄະນະ​ກຳມະການ​ກວດກາ ມີ 4 ຂັ້ນຄື: ຂັ້ນສູນ​ກາງ; ກະຊວງ, ຂັ້ນ​ແຂວງ-ກຳ​ແພງ​ນະຄອນ; ຂັ້ນ​ເມືອງ; ຂັ້ນໜ່ວຍ​ພັກຮາກ​ຖານເຊິ່ງຢູ່ທ້ອງ​ຖິ່ນ​ເອີ້ນວ່າ​: ຄະນະ​ກຳມະການກວດກາ​ພັກ-ລັດ.
  • ໃນໄລຍະ​ປີ 1993 ຫາ 1995, ນາຍົກລັດຖະມົນຕີໄດ້​ອອກດຳລັດເລກທີ 87 ລົງວັນທີ 07/06/1993 ສ້າງຕັ້ງຄະນະ​ສະ​ເພາະ​ກິດ​ຕ້ານ ແລະ ສະກັດ​ກັ້ນການ​ສໍ້​ລາດ​ບັງ​ຫຼວງຂັ້ນສູນ​ກາງປະກອບມີ 9 ທ່ານ ໂດຍແມ່ນສະຫາຍ ໄມຈັນຕານ ແສງມະນີ ປະທານຄະນະກຳມະການກວດກາສູນ​ກາງພັກເປັນຫົວໜ້າ; ສະຫາຍ ສຽວສະຫວາດ ສະແຫວງສຶກສາ ກຳມະການ ຄະນະກຳມະການ​ກວດກາສູນ​ກາງ​ພັກ​​ເປັນ​ຮອງ; ສະຫາຍ ບຸນ​ທອງ ຈິດ​ມະນີ ຮອງ​ຫົວ ໜ້າຄະນະ​ຈັດຕັ້ງສູນ​ກາງ, ​ສະຫາຍ ​ບົວ​ສອນ ບຸບ​ຜາ​ວັນ ຮອງ​ລັດຖະມົນຕີ​ປະຈຳ​ສຳນັກງານ​ນາຍົກ, ສະຫາຍ​ ກິ​ສິນ ສິນ​ພັນ​ງາມ ຮອງ​ອະທິ​​ໄອຍະ​ການ ປະຊາຊົນ, ສະຫາຍ ກິ​ແກ້ວ ​ເນົາວະ​ລາດ ຈາກ​ກະຊວງ​ພາຍ​ໃນ, ສະຫາຍ ສຸພັນ ຈາກ​ກະຊວງ​ການ​ເງິນ, ສະຫາຍ ​ຄຳ​ສຸກ ບຸນ​ຍະ​ວົງ ຮອງ​ຫົວໜ້າ​ກົມ​ກວດກາພັກທ້ອງ​ຖິ່ນ ແລະ ສະຫາຍ ວຽງ ພິລາແດງ ຫົວໜ້າ​ຫ້ອງການຄະນະ​ກຳມະການ​ກວດກາ​ສູນ​ກາງພັກ ​ເປັນກຳມະການ. ຢູ່ຂັ້ນ​ແຂວງກໍ່​ໄດ້​ສ້າງຕັ້ງ​ຄະນະ​ສະ​ເພາະ​ກິດ​ຕ້ານ ແລະ ສະກັດ​ກັ້ນການ​ສໍ້​ລາດ​ບັງ​ຫຼວງຂັ້ນ​ແຂວງ ໂດຍ​ແມ່ນປະທານຄະນະ​ກຳມະການ​ກວດກາ​ພັກ​ ​ແລະ ລັດ​ເປັນ​ຫົວໜ້າຄະນະ​ດັ່ງກ່າວ​ ພ້ອມທັງ ມີ​ກົງຈັກ​ຊ່ວຍ​ວຽກຈຳນວນ​ໜຶ່ງ. ນອກຈາກ​​ການຈັດຕັ້ງທີ່ກ່າວ​ມານັ້ນ, ຢູ່​ຂັ້ນສູນ​ກາງ​ໄດ້​ສ້າງຕັ້ງອົງການ​ກວດກາ​ລັດຖະບານ ທີ່​ຂຶ້ນກັບ​ສຳນັກງານ​ນາຍົກລັດ ຖະມົນຕີໂດຍ​ແມ່ນ ສະຫາຍ ວັນ​ທອງ ​ແສງ​ເມືອງ ເປັນ​ປະທານ ​ແລະ ສະຫາຍ ສົມບູນ ລາຊະສົມບັດ ​ເປັນ​ຮອງ​ປະທານ. ມາ​ຮອດ​ທ້າຍ​ປີ 1996 ນາຍົກລັດຖະມົນຕີ​ໄດ້​ອອກດຳລັດ​ເລກທີ 179 ລົງ​ວັນ​ທີ 1/ 11/ 1996  ຕົກລົງ​ຍຸບເລີກ ຄະນະ​ສະ​ເພາະ​ກິດ​ຕ້ານ​ການ​ສໍ້​ລາດ​ບັງ​ຫຼວງຂັ້ນສູນ​ກາງ ​ແລະ ຕໍ່​ມາ​ກໍ່​ໄດ້​ຕົກລົງ​ຍຸບ​ເລີກ ອົງການ​ກວດກາລັດຖະບານ. ມອບ​ວຽກ​ຂອງການຈັດຕັ້ງ ດັ່ງກ່າວ​ໃຫ້​ຄະນະ​ກຳມະ ການ​ກວດກາ​ພັກ ​ແລະ ລັດ​ເປັນ​ຜູ້​ເຮັດ, ໄລຍະນີ້ໄດ້​ກວດກາ​ການ​ນຳພາ​ຮອບດ້ານ ຂອງ​ຄະນະ​ໜ່ວຍພັກ ​ແລະ ຄະນະ​ພັກເມືອງ, ​ເຊິ່ງ​ໄດ້​ກວດກາ​ທັງ​ໝົດ 23 ອົງຄະ​ນະ​ພັກ​ເມືອງ, 7.971 ເທື່ອ ໜ່ວຍພັກ, ມີ​ສະມາຊິກ​ພັກ​ຮັບ​ການ​ກວດກາ 85.982 ເທື່ອ​ຄົນ. ດ້ານ​ລັດ, ​ໄດ້​ດຳ​ເນີນ​ການ​ກວດກາ​ ສະກັດ​ກັ້ນ ແລະ ຕ້ານການ​ສໍ້​ລາດ​ບັງ​ຫຼວງຢູ່ 360 ການຈັດຕັ້ງ ບໍລິຫານ-ຫົວ​ໜ່ວຍທຸລະ​ກິດ-ວິ​ສາ​ຫະກິດ ​ແລະ ກົມ​ກອງ​ໃນ​ກຳລັງ​ປະກອບ​ອາວຸດ, ຜ່ານ​ການ​ກວດ​ກາ​ເຫັນເງິນ ຄຳ-ຊັບສິນ​ຂອງ​ລັດ ​ແລະ ລວມໝູ່​ຕົກ​ເຮ່ຍ​ເສຍ​ຫາຍລວມມູນ​ຄ່າ 32 ຕື້ກວ່າ​ກີບ. ເກັບ​ກູ້​ຄືນ​ໄດ້ 20 ຕື້ກວ່າກີບ, ປະຕິບັດ​ວິ​ໄນ​ຕໍ່ຜູ້​ກະທຳ​ຜິດ​ທັງ​ໝົດ 960 ຄົນ.

4.ໄລຍະປີ 1996-2001 (ສະ​ໄໝ​ກອງ​ປະຊຸມ​ໃຫຍ່​ຄັ້ງທີ VI ຂອງ​ພັກ).

  • ໃນ​ສະ​​ໄໝນີ້, ຢູ່​ຂັ້ນສູນ​ກາງ​ໄດ້ໂຮມກວດກາ​ພັກ ​ແລະ ກວດກາ​ລັດ​ເຂົ້າ​ເປັນ​ການຈັດຕັ້ງດຽວ​ ໄດ້ປ່ຽນ​ຊື່​ຈາກ ຄະນະ​ກຳມະການ​ກວດກາ​ສູນ​ກາງພັກ​​ ເປັນຄະນະ​ກຳມະການ​ກວດກາ​ຂັ້ນສູນ​ກາງປະກອບມີ​ປະທານ 1 ສະຫາຍ, ຮອງ ປະທານ 2 ສະຫາຍ ແລະ ກຳມະການ ​​10 ສະຫາຍ ​ໂດຍ​ແມ່ນ ສະຫາຍ ວົງ​ເພັດ ​ໄຊ​ເກີ​ຢາ​ຈົງ​ຕົວ​ ກຳມະການ​ສູນ​ກາງ​ພັກ​ເປັນປະທານ; ສະຫາຍ ຈັນ​ສຸກ ບຸນ​ປະຈິດ ​ແລະ ສະຫາຍ ໜູ​ໄຊ ສິດທິ​ໄຊ​ ເປັນ​ຮອງ​ປະທານ; ສະຫາຍ ​ຄຳ​ມີ ໄຊຍະວົງ, ຮອງ​ຫົວໜ້າ​ຄະນະ​ໂຄສະນາ​ອົບຮົມ​ສູນ​ກາງ​ພັກ, ສະຫາຍ ທອງ​ສາ ປັນຍາ​ສິດ ຫົວໜ້າ​ຫ້ອງ​ວ່າການ​ສະພາ​ແຫ່ງ​ຊາດຊຸດ​ທີ 5, ສະຫາຍ ນາງ ບົວ​ວອນ ອ່ອນ​ຈັນ​ຫອມ ຮອງ​ປະທານ​ສູນ​ກາງສະຫະພັນແມ່ຍິງລາວ, ສະຫາຍ ບຸນປອນ ສັງ​ສົມ​ສັກ ຮອງ​ປະທານສູນ​ກາງ​ສະຫະພັນກຳ​ມະ​ບານ, ສະຫາຍ ​ເພັດສາຄອນ ຫຼວງ​ອາ​ໄພ ຮອງ​ເລຂາ​ສູນ​ກາງ​ຊາວ​ໜຸ່ມ, ສະຫາຍ ຕົງ​ເຢີ​ທໍ ຮອງ​ປະທານ​ສູນ​ກາງ​ແນວ​ລາວ​ສ້າງ​ຊາດ, ສະຫາຍ ພົນ​ຈັດຕະວາ ສຸດ​ໃຈ​  ທຳມະສິດ ຮອງ​ລັດຖະມົນຕີກະຊວງ​ພາຍ​ໃນ, ສະຫາຍ ພົນ​ຈັດຕະວາ ເຫຼົາ ​ແກ້ວ​ປະ​ເສີດ ຫົວໜ້າ​ກົມ​ກວດກາ​ກອງທັບ, ສະຫາຍ ຊຽງ​ສິງ ວິ​ຜາສຸກ ຮອງ​ຫົວໜ້າ​ຄະນະ​ຈັດຕັ້ງສູນ​ກາງ ແລະ ສະຫາຍ ຢາ​ວ ພອນ​ວັນ​ທາ ຮອງ​ລັດຖະມົນຕີ ກະຊວງການເງິນ ​ເປັນ​ກຳມະການ. ມາ​ຮອດ​ປີ 1999 ​ໄດ້​ມີ​ການ​ແຕ່ງຕັ້ງ ທ່ານ  ຄຳ​ມີ ​ໄຊ​ຍະ​ວົງ ​ເປັນ​ຮອງ​ປະທານ. 
  • ກົງຈັກ​ຊ່ວຍ​ວຽກຂອງຄະນະ​ກຳມະການ​ກວດກາ​ຂັ້ນສູນ​ກາງ​​ມີ 6 ກົມ ​ແລະ 1 ຫ້ອງ​ການ​ຄື: ຫ້ອງ​ການ​ຂອງ​ຄະນະ, ກົມກວດກາພັກ​ອ້ອມ​ຂ້າງ, ກົມ​ກວດກາ​ ພັກ​ທ້ອງ​ຖິ່ນ, ກົມ​ກວດກາ​ລັດ​ບໍລິຫານ, ກົມ​ກວດກາ ​ທຸລະ​ກິດ-ວິ​ສະຫະ​ກິດ, ກົມໂຄສະນາ​ວາລະສານ​ກວດກາ, ກົມຄົ້ນຄວ້າຈົດໝາຍ​ຮ້ອງຟ້ອງ-ຮ້ອງທຸກ.
  • ລະບົບ​ການຈັດຕັ້ງຄະນະ​ກຳມະການ​ກວດກາມີ 4 ຂັ້ນຄືສະ​​ໄໝ​ທີ V, ​ແຕ່ຢູ່​ບັນດາ​ກະຊວງ​ອົງການ ຈຳນວນ​ໜຶ່ງ ນອກຈາກ​ຕັ້ງຄະນະ​ກຳມະການ​ກວດກາຂອງ​ ຄະນະ​ພັກ​ຍັງ​ສ້າງຕັ້ງກົມ​ກວດກາ​ທີ່​ເຮັດ​ວິຊາ​ສະ​ເພາະ​ກວດກາໄລຍະນີ້, ໄດ້ກວດກາ​ການ​ນຳ​ພາ​ຮອບດ້ານ​ຂອງ​ຄະນະ​ໜ່ວຍພັກ ​ແລະ ການກໍ່ສ້າງ​ໜ່ວຍພັກ​ແຂງ​ຮູ້​ນຳພາ​ຮອບດ້ານ​ຢູ່ 1.629 ໜ່ວຍພັກ, ກວດກາ​ດຳ​ເນີນ​ຊີວິດ​ການ​ເມືອງ​ຢູ່ 2.864 ໜ່ວຍພັກ, ກວດກາ​ສະກັດ​ກັ້ນ ​ແລະ ຕ້ານການ​ສໍ້​ລາດບັງ​ຫຼວງຢູ່ 174 ເປົ້າ​ໝາຍ.

5. ໄລຍະປີ 2001-2006 (ສະ​ໄໝ​ກອງ​ປະ ຊຸມ​ໃຫຍ່​ຄັ້ງທີ VII ຂອງ​ພັກ).

  • ຢູ່​ຂັ້ນສູນ​ກາງ​ໄດ້​ແຍກ​ກວດກາ​ພັກ ​ແລະ ກວດກາ​ລັດ​ອອກ​​ເປັນ 2 ອົງການ, ກວດກາ​ພັກ​ເອີ້ນວ່າ ຄະນະ​ກຳມະການ​ກວດກາສູນ​ກາງ​ພັກ, ກວດກາ​ລັດ​ເອີ້ນວ່າ: ອົງການກວດກາ​ແຫ່ງ​ລັດ. ຢູ່​ຂັ້ນກະຊວງ​ ແລະ​  ທ້ອງ​ຖິ່ນເປັນ​ກົງຈັກ​ດຽວທີ່ເຮັດ​ທັງວຽກກວດກາພັກ​-ກວດກາ​ລັດ. ຢູ່​ຂັ້ນກະຊວງ​ເອີ້ນວ່າ ກົມ​ກວດກາ​ ຫຼື ຄະນະ​ກຳມະການ​ກວດກາ, ຢູ່​ຂັ້ນ ທ້ອງ​ຖິ່ນ​​ເອີ້ນວ່າ: ຄະນະກຳມະການກວດກາພັກ-ລັດ.
  • ໂຄງ​ປະກອບ​ຄະນະ​ນຳ​ຂອງຄະນະ​ກຳມະການ​ກວດກາ​ສູນ​ກາງພັກ​ປະກອບມີ​ປະທານ 1 ສະຫາຍ, ຮອງ​ປະທານ 2 ສະຫາຍ ​ແລະ ກຳມະການ​ 4 ສະຫາຍ ​ໂດຍ​ແມ່ນສະຫາຍ ວົງ​ເພັດ ​ໄຊ​ເກີ​ຢາ​ຈົງ​ຕົວ ກຳມະການ​ສູນ​ກາງ​ພັກ​ເປັນ​ປະທານ; ສະຫາຍ ຈັນ​ສຸກ ບຸນ​ປະຈິດ ​ແລະ ສະຫາຍ ໜູ​ໄຊ ສິດທິ​ໄຊ ​ເປັນ​ຮອງປະທານ; ສະຫາຍ ຄຳ​ສວນ ຈັນທະ​ວົງ ສະຫາຍ ຊຽງ​ສິງ ວິ​ຜາ​ສຸກ ຮອງ​ຫົວໜ້າ​ຄະນະ​ຈັດຕັ້ງສູນ​ກາງ, ສະຫາຍ ຕົງ​ເຢີ​ທໍ ຮອງ​ປະທານສູນ​ກາງ​ແນວລາວ ສ້າງຊາດ ​ແລະ ສະຫາຍ ​ດວງ​ດີ ອຸດທະ​ຈັກ ຮອງ​ຫົວໜ້າ​ຄະນະ​ໂຄສະນາ​ອົບຮົມ​ສູນກາງເປັນກຳມະການ​.  ຮອດ​ປີ 2004 ສູນ​ກາງ​ ໄດ້​ຕົກລົງ​ໃຫ້​ ສະຫາຍ ​ໜູູ​ໄຊ ສິດທິ​ໄຊ ພັກຜ່ອນ​ຮັບ​ບຳນານ ​ແລະ ແຕ່ງຕັ້ງ   ສະຫາຍ​  ແຫວນທອງ ຫຼວງ​ວິ​ໄລ  ກຳມະການ​ສູນ​ກາງ​ພັກ​, ລັດຖະມົນ​ປະຈຳ​ສຳນັກ​ນາຍົກລັດຖະມົນຕີ ມາ​ເປັນຮອງ​ປະທານ;
  • ຮອງ​ປະທານຄະນະ​ກຳມະການ​ກວດກາ​ສູນ​ກາງ 1 ສະຫາຍ (ສະຫາຍ ​ໜູ​ໄຊ ສິດທິ​ໄຊ ​ແລະ ຕໍ່​ມາ ສະຫາຍ ແຫວນທອງ ຫຼວງ​ວິ​ໄລ) ເປັນ​ປະທານອົງການ​ກວດກາ​ແຫ່ງ​ລັດ. ອົງການ​ກວດກາ​ແຫ່ງ​ລັດມີ ຮອງ​ປະທານ 2 ສະຫາຍ​ຄື: ສະຫາຍ ຄຳ​ສຸກ ບຸນ​ຍະ​ວົງ ​ແລະ ສະຫາຍ ລັງສີ ສີ​ບຸນ​ເຮືອງ.
  • ກົງຈັກ​ຊ່ວຍ​ວຽກຂອງຄະນະ​ກຳມະການ​ກວດກາສູນ​ກາງພັກ​​ມີ 3 ກົມ ​ແລະ 1 ຫ້ອງ​ການ​ຄື: ຫ້ອງ​ການ​ຂອງ​ຄະນະ, ກົມກວດກາພັກ, ກົມຄົ້ນຄວ້າຈົດ ໝາຍ​ຮ້ອງຟ້ອງ-ຮ້ອງທຸກ, ກົມຄົ້ນຄວ້າ​ສັງ​ລວມ​ໂຄ ສະນາຂ່າວສານ.
  • ກົງຈັກ​ຊ່ວຍ​ວຽກ​ຂອງອົງການ​ກວດກາ​ແຫ່ງ​ລັດປະກອບມີ 3 ກົມ ​ແລະ 1 ຫ້ອງ​ການ​ຄື: ຫ້ອງ​ການ​, ກົມ​ກວດກາ​ລັດ​ບໍລິຫານລັດ​, ກົມ​ກວດກາ​​ເສດຖະ​ກິດ, ກົມຄົ້ນຄວ້າຄຳ​ຮ້ອງ ​ແລະ ຄຳ​ສະ​ເໜີ.
  • ລະບົບ​ການຈັດຕັ້ງຄະນະ​ກຳມະການ​ກວດກາພັກມີ 4 ຂັ້ນຄື: ຂັ້ນສູນ​ກາງ; ຂັ້ນ​ກະຊວງ, ແຂວງ-ກຳ​ແພງ​ນະຄອນ; ຂັ້ນເມືອງ-ກົມ​ກອງ; ຂັ້ນໜ່ວຍພັກຮາກ​ຖານ.
  •  ລະບົບ​ການຈັດຕັ້ງ ​ຂອງອົງການ​ກວດກາ​ແຫ່ງ​ລັດມີ 3 ຂັ້ນຄື : ຂັ້ນສູນ​ກາງ; ຂັ້ນ​ກະຊວງ, ແຂວງ-ກຳ​ແພງ​ນະຄອນ ແລະ ຂັ້ນ​ເມືອງ. ໃນ​ສະ​ໄໝ​ນີ້ ນາຍົກລັດຖະມົນຕີ ​ໄດ້​ອອກ​ຂໍ້​ຕົກ ລົງ​ເລກທີ 52 ລົງ​ວັນ​ທີ 06/10/2004 ແຕ່ງຕັ້ງ ຄະນະຊີ້ນຳ ຕ້ານ​ການ​ສໍ້​ລາດ​ບັງຫຼວງປະກອບ​ດ້ວຍ: ສະຫາຍ  ອາຊາ​ງ ລາວ​ລີ  ຮອງ​ນາຍົກ​ລັດຖະມົນຕີ ​ເປັນ​ຫົວໜ້າ; ສະຫາຍ ວົງ​ເພັດ ​ໄຊ​ເກີ​ຢາ​ຈົງ​ຕົວ ປະທານ​ຄະນະ​ກຳມະການ​ກວດກາ​ສູນ​ກາງ​ພັກເປັນ​ຮອງ; ສະຫາຍ ບຸນ​ທອງ ຈິດມະນີ ຫົວໜ້າ​ຄະນະ​ຈັດຕັ້ງ ສູນ​ກາງ​ພັກ, ສະຫາຍ ​ແຫວນ​ທອງ ຫຼວງ​ວິ​ໄລ ປະທາ​ນອົງການ​ກວດກາ​ແຫ່ງ​ລັດ, ສະຫາຍ ລັງສີ ສີ​ບຸນ​ ເຮືອງ ຮອງ​ປະທານ​ອົງການ​ກວດກາ​ແຫ່ງ​ລັດ​ ແລະ ສະຫາຍ ຄຳ​ມູນ ວິ​ພົງ​ໄຊ ຫົວໜ້າ​ກົມ​ການ​ປົກຄອງ​ ແລະ ຄຸ້ມ​ຄອງລັດຖະກອນ ເປັນ​ຄະນະໄລຍະ​ນີ້, ດ້ານ​ພັກໄດ້​ກວດກາ​ການ​ນຳພາ​ຮອບ ດ້ານ​ຂອງ​ອົງຄະ​ນະ​ພັກ​ແຂວງ​ຢູ່ 3 ແຂວງ, ກວດກາ​ຮັບ​ໃຊ້​ການ​ດຳ​ເນີນ​ຊີວິດ​ການ​ເມືອງຂອງ​ອົງຄະ​ນະ​ພັກ​ແຂວງ​ຢູ່ 2 ແຂວງ, ກວດກາການກໍ່ສ້າງ​ໜ່ວຍ ພັກ​ແຂງຮູ້​ນຳພາ​ຮອບ​ດ້ານ. ຜ່ານ​ການ​ກວດກາ ມີ​ສະມາຊິກ​ພັກ​ຖືກ​ປະຕິບັດ​ວິ​ໄນທັງ​ໝົດ 330 ສະຫາຍ​, ໃນ​ນັ້ນພະນັກງານ​ຂັ້ນສູນ​ກາງຄຸ້ມ​ຄອງ 24 ສະຫາຍ. ດ້ານ​ລັດ​ໄດ້​ດຳ​ເນີນ​ການ​ກວດກາ​ຢູ່​ໃນ​ຫຼາຍ​ຂົງເຂດ​ຄື: ການ​ນຳ​ລົດ​ເຂົ້າ, ການ​ຂຸດ​ຄົ້ນ​ໄມ້, ​ໂຄງການ​ກໍ່ສ້າງ​ ຊົນລະປະທານ, ການ​ເຄື່ອນ​ໄຫວ​ທຸລະ​ກິດ​ຂອງ​ລັດ​ວິສາຫະກິດ, ການ​ເກັບ​ລາຍ​ຮັບ​ງົບປະມານ......... ຜ່ານ​ການ​ກວດກາ​ເປົ້າ​ໝາຍ​ເຫຼົ່ານັ້ນ​ ໄດ້​ກວດກາ​ເຫັນ​ຜົນເສຍ​ຫາຍ ຂອງ​ລັດ 472,9 ຕື້ກີບ, 6,2 ລ້ານ​ບາດ ແລະ 21,8 ລ້ານ​ໂດ​ລາ; ​ໃນ​ນັ້ນ​ເກັບ​ກູ້​ຄືນ​ໄດ້ 196,1 ຕື້ກີບ, 3,5 ລ້ານ​ບາດ ແລະ 542.980 ໂດ​ລາ.

6. ໄລຍະປີ 2006 - 2011(ສະ​ໄໝ​ກອງ​ປະຊຸມ​ໃຫຍ່​ຄັ້ງທີ VIII ຂອງ​ພັກ).

  • ຢູ່​ຂັ້ນສູນ​ກາງ​ໄດ້​ໂຮມ​ຄະນະ​ກຳມະການ​ກວດກາ​ສູນ​ກາງ​ພັກ ​ແລະ ອົງການ​ກວດກາ​ແຫ່ງ​ລັດ​ເຂົ້າ​ເປັນ​ກົງຈັກ​ອັນ​ດຽວ ເອີ້ນວ່າ​: ຄະນະ​ກຳມະການ​ກວດກາ​ສູນ​ກາງ. ​ໃນ​ກົງ​ຈັກ​ຂອງ​ຄະນະ​ກຳມະການ​ກວດກາ​ສູນ​ກາງມີ​ກົງຈັກ​ກວດກາ​ລັດ ເອີ້ນວ່າ:​ ອົງການກວດກາ​ລັດຖະບານ ​ເຊິ່ງມີ​ກົງຈັກ​ຊ່ວຍ​ວຽກຈຳນວນ​ໜຶ່ງ. ກົງຈັກ​ຊ່ວຍ​ວຽກຂອງ​ຄະນະ​ກຳມະການ ກວດກາ​ສູນ​ກາງ​ປະກອບ​ມີ 1 ຫ້ອງການ ແລະ 7 ກົມຄື: ຫ້ອງການ, ກົມ​ຄົ້ນຄວ້າ​ສັງ​ລວມ, ກົມ​ຄົ້ນຄວ້າ​ຄຳ​ຮ້ອງ​ຟ້ອງ-ຮ້ອງທຸກ, ກົມ​ກວດກາ​ພັກ​ອ້ອມ​ຂ້າງ, ກົມ​ກວດກາ​ພັກ​ທ້ອງ​ຖິ່ນ, ກົມ​ກວດກາການ​ບໍລິຫານ​ລັດ, ກົມ​ກວດກາ​ເສດຖະກິດ ​ແລະ ກົມ​ກວດກາ​ຕ້ານ​ການ​ສໍ້​ລາດ​ບັງ​ຫຼວງ.
  • ໂຄງປະກອບ​ຄະນະ​ນຳ​ຂອງ​ຄະນະ​ກຳມະການກວດກາ​ສູນ​ກາງ​ມີ​ປະທານ 1 ສະຫາຍ, ຮອງ​ປະທານ 2 ສະຫາຍ, ກຳມະການ 4 ສະຫາຍ, ໂດຍ​ແມ່ນ ສະຫາຍ ອາຊາ​ງ ລາວ​ລີ ກຳມະການ​ກົມ​ການ​ ເມືອງ​ສູນ​ກາງ​ພັກ, ຮອງ​ນາຍົກ​ລັດຖະມົນຕີ​ເປັນ​ປະທານ; ສະຫາຍ ຈັນ​ສຸກ ບຸນ​ປະຈິດ ​ແລະ ສະຫາຍ ທອງ​ສີ ອ້ວນ​ລາສີ ​ເປັນ​ຮອງ​ປະທານ; ສະຫາຍ ຄຳ​ສວນ ຈັນທະ​ວົງ, ສະຫາຍ ຄຳ​ສຸກ ບຸນ​ຍະ​ວົງ, ສະຫາຍ ສິງ​ເພັດ ບຸນ​ສະຫວັດ​ທິພັນ ​ແລະ ສະຫາຍ ລັງສີ ສີບຸນເຮືອງ ເປັນ​ກຳມະການ. ຮອດ​ປີ 2007 ສະຫາຍ ລັງສີ ສີ​ບຸນ​ເຮືອງ ​​ໄດ້​ຍົກຍ້າຍ​ໄປ​ບ່ອນ​ໃໝ່ ແລະ ໄດ້ແຕ່ງຕັ້ງ ສະຫາຍ ບຸນປອນ ສັງ​ສົມ​ສັກ ມາ​​ເປັນ​ກຳມະການ​. ​ໃນ​ປີ 2010 ​ໄດ້​ມີ ການ​ແຕ່ງຕັ້ງ ສະຫາຍ ສີ​​ໃນ ມຽງ​ລາ​ວັນ ກຳມະການ​ສູນກາງ​ພັກເປັນ​ຮອງ​ປະທານ.
  • ດ້ານ​ອົງການ​ກວດກາ​ລັດຖະບານ ກອງ​ປະຊຸມ​ຄັ້ງປະຖົມມະ​ເລີກ​ຂອງ​ສະພາ​ແຫ່ງ​ຊາດ​ຊຸດ​ທີ 6 ​ໄດ້​ຮັບຮອງ​ເອົາ​ ສະຫາຍ ອາຊາ​ງ ລາວ​ລີ ​ເປັນ​ປະທານ​ອົງການ​ກວດກາ​ລັດຖະບານ; ນາຍົກ​ລັດ​ຖະມົນຕີໄດ້​ແຕ່ງຕັ້ງ ສະຫາຍ ທອງ​ສີ ອ້ວນ​ລາສີ ເປັນຮອງປະທານ ​ອົງການ​ກວດກາ​ລັດຖະບານ, ສະຫາຍ ຄຳ​ສຸກ ບຸນ​ຍາ​ວົງ ແລະ ສະຫາຍ ລັງສີ ສີບຸນເຮືອງ (ຕໍ່​ມາ​ແມ່ນ​  ທ່ານ ບຸນ​ປອນ ສັງ​ສົມ​ສັກ)  ເປັນ​ຄະນະໃນ​ອົງການ​ກວດກາ​ລັດຖະບານ.
  • ລະບົບ​ການຈັດຕັ້ງຄະນະ​ກຳມະການ​ກວດກາ ​ມີ 4 ຂັ້ນທາງ​ດ້ານກົງຈັກ​ຄະນະ​ກຳມະການ​ກວດກາຂັ້ນ ກະຊວງ, ແຂວງ​, ນະຄອນຫຼວງ ແລະ ຂັ້ນ​ເມືອງ ແມ່ນ​ຈັດຕັ້ງຄື​ກັນ​ກັບ ຄະນະ​ກຳມະການ​ກວດກາ​ສູນ​ກາງ; ​ແຕ່​ຢູ່​ແຂວງ, ນະຄອນຫຼວງ ແລະ ຂັ້ນ​ເມືອງ ນອກຈາກ​ມີ​ປະທານ, ຮອງ​ປະທານ ແລະ ກຳມະການປະຈຳແລ້ວ ​ຍັງ​ມີ​ກຳມະການ​ທີ່​ບໍ່ປະຈຳ​ອີກ​ຈຳນວນ​ໜຶ່ງ.
  • ໄລຍະນີ້ ໄດ້​ສຸມ​ໃສ່​ຕິດຕາມ, ​ກວດກາ​ການ​ປັບປຸງ​ການຈັດຕັ້ງພັກ, ຄະນະ​ພັກ ແລະ ກວດກາຕີ​ລາຄາ​ຄຸນ​ນະພາ​ບ ການກໍ່ສ້າງ​ໜ່ວຍພັກ​ແຂງ​ ຮູ້ນຳພາ​ຮອບດ້ານ ​ເຊິ່ງໄດ້​ກວດກາ​ຕີ​ລາຄາຄຸນ​ນະພາ​ບ ໜ່ວຍ​ພັກຈຳນວນ 18.208 ເທື່ອໜ່ວຍພັກ, ສະມາຊິກ​ພັກ​ໄດ້​ຮັບ​ການກວດກາ​ແບ່ງ​ປະ​ເພດ 197.878 ເທື່ອ ສະຫາຍ. ຜ່ານ​ການ​ກວດກາ​ໄດ້​ປະຕິບັດ​ວິ​ໄນ​ຄື: ຕິຕຽນ 1 ຮາກ​ຖານ​ພັກ, ກ່າວ​ເຕືອນ 4 ຮາກ​ຖານ​ພັກ ​ແລະ 1 ຄະນະ​ພັກ​ເມືອງ, ຍຸບ​ການຈັດຕັ້ງ 4 ຮາກຖານ​ພັກ, ສະມາຊິກ​ພັກ​ຖືກ​ວິ​ໄນ 597 ຄົນ. ດ້ານລັດ​ໄດ້​ກວດກາກ່ຽວ​ກັບ​ການຈັດຕັ້ງປະຕິບັດ ບັນດາ​ກົດໝາຍ, ລະບຽບ​ການ-ຂໍ້​ກຳນົດ​ຕ່າງໆ​ຂອງ​ລັດ ແລະ ການປະຕິບັດ​ພາລະ​ບົດບາດຂອງ ອົງການທີ່​ຖືກ​ກວດກາເຊິ່ງກວດກາ 597 ເປົ້າໝາຍ ເຫັນ​​ໄດ້ຜົນ​​ເສຍ​ຫາຍມີ​ມູນ​ຄ່າ​ທັງ​ໝົດ​ເປັນ​ເງິນ​ກີບ 463,084 ຕື້ກີບ, ເປັນ​ເງິນ​ໂດ​ລາ​ອາ​ເມ​ລິ​ກາ 765.441 ໂດລາ; ​ໃນ​ຈຳນວນ​ເສຍ​ຫາຍ​ດັ່ງກ່າວ​ນັ້ນ ສາມາດ​ເກັບ​ກູ້​ຄືນ​ມາ​ໃຫ້​ລັດ​​ເປັນ​ເງິນ​ກີບ 42,5 ຕື້ກີບ ​ແລະ ​ເປັນ​ເງິນ​ໂດ​ລາ 508.368 ​ໂດ​ລາ.

7. ປີ 2011 ມາ​ເຖີງປະຈຸ​ບັນ.(ສະ​ໄໝ​ກອງ​ປະຊຸມ​ໃຫຍ່​ຄັ້ງທີ IX ຂອງ​ພັກ).

ໃນກອງປະຊຸມ​ໃຫຍ່ຄັ້ງທີ IX ຂອງ​ພັກ ​ໄດ້​ຕົກລົງ​ປ່ຽນ​ຊື່ຈາກ​ ຄະ​ນະກຳມະການ​ກວດກາ​ພັກ ມາເປັນ​ຄະນະ​ກວດກາ​ສູນກາງພັກ. ​ໂຄງປະກອບຄະນະນຳ​ ຄະນະ​ກວດກາມີ​ປະທານ ​ແລະ ຮອງ​ປະທານ (ບໍ່​ມີ​ກຳມະການຄືສະ​ໄໝ​ທີ  VIII  ຄືນ​ເມືອ​ຫຼັງ). ໃນກົງຈັກ​ການຈັດຕັ້ງອັນ​ດຽວ ມີ​ການຈັດຕັ້ງຄະນະກວດກາ​ພັກ ​ແລະ ຄະນະ​ກວດກາ​ລັດ.

ສະ​ເພາະ​ຢູ່​ຂັ້ນສູນ​ກາງ ມີ​ການຈັດຕັ້ງຄະນະ​ກວດກາ​ສູນ​ກາງ​ພັກ ​ແລະ ອົງການ​ກວດກາ​ລັດຖະບານ​ ເຊິ່ງດ້ານ​ຄະນະ​ກວດກາ​ສູນ​ກາງ​ພັກມີ​ປະທານ 1 ສະຫາຍ ​ແລະ ຮອງ​ປະທານ 6 ສະຫາຍ ​ໂດຍ​ແມ່ນ ສະຫາຍ ບຸນ​ທອງ ຈິດ​ມະນີ ກຳມະການ ກົມການເມືອງ, ​ເລຂາທິການ​ສູນ​ກາງ​ພັກ ​ເປັນ​ປະທານ;  ສະຫາຍ ທອງ​ສີ ອ້ວນ​ລາສີ, ສະຫາຍ ສີ​​ໃນ ມຽງ​ລາ​ວັນ, ສະຫາຍ ຄຳສວນ ຈັນທະ​ວົງ, ສະຫາຍ ຄຳ​ສຸກ ບຸນ​ຍະ​ວົງ, ສະຫາຍ ສິງ​ເພັດ ບຸນ​ສະຫວັດ​ທິ​ພັນ ​ແລະ ສະຫາຍ ບຸນ​ປອນ ສັງ​ສົມ​ສັກ ​ເປັນຮອງ​ປະທານ.​ ​ດ້ານ​ອົງການ​ກວດກາ​ລັດຖະບານ ມີ​ປະທານ 1 ສະຫາຍ ໂດຍ​ແມ່ນ ສະຫາຍ ບຸນ​ທອງ​ຈິດ​ມະນີ ເປັນປະທານ ​ເຊິ່ງ​ໄດ້​ຖືກ​ຮັບຮອງ​ຈາກກອງ​ປະຊຸມ​ຄັ້ງປະຖົມມະ​ເລີກ​ຂອງ​ສະພາ​ແຫ່ງຊາດ​ຊຸດ​ທີ 7 ​ແລ​ະ ນາຍົກລັດຖະມົນຕີ​ໄດ້​ແຕ່ງຕັ້ງ ສະຫາຍ ທອງ​ສີ ອ້ວນ​ລາສີ, ສະຫາຍ ຄຳ​ສຸກ ບຸນ​ຍະ​ວົງ, ສະຫາຍ ສິງ​ເພັດ ບຸນ​ສະຫວັດ​ທິພັນ ​ແລະ ສະຫາຍ ບຸນປອນ ສັງ​ສົມ​ສັກ ​ເປັນ​ຮອງ​ປະທານອົງການ​ກວດກາລັດຖະບານ.

ກົງຈັກ​ຊ່ວຍ​ວຽກຂອງ​ຄະນະ​ກວດກາ​ສູນ​ກາງ​ພັກ ​ແລະ ອົງການ​ກວດກາ​ລັດຖະບານມີ 9 ກົມ ແລະ 1 ຫ້ອງການ​ຄື: ຫ້ອງການ​, ກົມ​ຈັດຕັ້ງພະນັກງານ, ກົມ​ຄົ້ນຄວ້າວາລະສານ​ກວດກາ, ກົມ​ຄົ້ນຄວ້າ​ຄຳ​ຮ້ອງ ​ແລະ ຄຳ​ສະ​ເໜີ, ກົມ​ກວດກາ​ພັກ​ອ້ອມ​ຂ້າງ, ກົມກວດກາ​ພັກ​ທ້ອງ​ຖິ່ນ, ກົມ​ກວດກາ​ລັດ​ອ້ອມ​ຂ້າງ, ກົມ​ກວດກາ​ລັດ​ທ້ອງ​ຖິ່ນ, ກົມ​ກວດກາຕ້ານ​ການ​ສໍ້​ລາດ​ບັງ​ຫຼວງ, ກົມພົວພັນ​ຕ່າງປະ​ເທດ.

ຜ່ານໄລຍະ 30 ປີ ​ແຫ່ງ​ການ​ເຕີບ​ໃຫຍ່ຂະ ຫຍາຍຕົວ​ຂອງ​ອົງການ​ກວດກາ​ພັກ-ລັດ,  ການຈັດຕັ້ງອົງການ​ກວດກາ​ພັກ-ລັດ​​ແຕ່ລະ​ຂັ້ນ​ໄດ້​ມີ​ການ​ປັບປຸງ​ຕາມ​ສະ​ໄໝ ກອງ​ປະຊຸມ​ໃຫຍ່​ຂອງ​ພັກ​ປະຊາຊົນ ​ປະຕິວັດ​ລາວ. ​ໃນໄລຍະກອງປະຊຸມໃຫຍ່ ຄັ້ງທີ VII ຄືນຫຼັງ, ກອງປະຊຸມຄະນະບໍລິຫານງານສູນກາງພັກ ໄດ້ເລືອກຕັ້ງປະທານກວດກາເທົ່ານັ້ນ, ນັບແຕ່ກອງ ປະຊຸມໃຫຍ່ຄັ້ງທີ VIII ຂອງພັກ ເປັນຕົ້ນມາ, ກອງປະຊຸມຄັ້ງປະຖົມມະລຶກ ຂອງຄະນະບໍລິຫານງາສູນກາງພັກ ໄດ້ເລືອກເອົາປະທານ ແລະ ຮອງປະທານ ຄະນະກວດກາສູນກາງ ມາ​ຮອດ​ປັດຈຸ​ບັນ​ການຈັດ ຕັ້ງອົງການ​ກວດກາ​ພັກ-ລັດ​ ໄດ້​ກາຍ​ເປັນ​ລະບົບ​ທີ່ມີ​ ໂຄງປະກອບກົງຈັກ​ຊ່ວຍ​ວຽກ​ທີ່ເໝາະສົມ,  ມີ​ພາລະບົດບາດ​ຈະ​ແຈ້ງ,​ ມີ​ຖັນ​ແຖວພະນັກງານ​​ເຮັດ​ວຽກ​ງານ​ ກວດກາ​ນັບ​ມື້​ເພີ່ມ ຂຶ້ນ; ສະ​ເພາະ​ຢູ່​ຄະນະ​ກຳມະການກວດກາ ພັກ-ລັດ ສູນ​ກາງໃນ​ປີ 1983 ມີ​ພະນັກງານ​ພຽງ​ 50 ຄົນ, ມາ​ຮອດ​ຕົ້ນ​ປີ 2012 ນີ້​ຄະນະ​ກວດກາ​ສູນ​ກາງ​ພັກໄດ້​ມີ​ພະນັກງານ 126 ຄົນ. ໄປ​ຄຽງ​ຄູ່​ກັບ​ການ​ປະຕິບັດ​ໜ້າ​ທີ່​​ກວດກາ, ຄະນະ​ກວດກາສູນ​ກາງ ໄດ້ຈັດຕັ້ງຜັນ​ຂະຫຍາຍ​ແນວທາງ​ການ​ຕ່າງປະ​ເທດ​ຂອງ​ພັກ ​ແລະ ລັດ ໂດຍ​ມີ​ການ​ພົວພັນ​​​ ກັບອົງການ​ກວດກາຂອງປະ​ເທດ ເພື່ອນ​ມິດ ແລະ ການຈັດຕັ້ງສາກົນ. ໃນ​ໄລຍະ​ປີ 1991 ຄືນ​ຫຼັງ ໄດ້​ມີ​ການ​ແລ​ກປ່ຽນຄະນະ​ຜູ້​ແທນ​ຂັ້ນສູງ​ ແລະ ວິຊາ​ການ ຢ້ຽມຢາມ​ຖອດຖອນ​ບົດຮຽນກັບ​ຄະນະ​ກຳມະການ​ກວດກາ​ ຂອງ​ພັກ​ຄອມ​ມູນິດ​ຫວຽດນາມ, ສະຫະພາບ​ໂຊ​ຫວຽດ, ກຳປູ​ເຈຍ, ບັນດາ​ປະ​ເທດ​ສັງຄົມ​ນິຍົມ​​​ໃນ​ຂົງ​ເຂດ​ອາຊີ ​ແລະ ເອີ​ລົບ​ຕາ​ເວັນ​ອອກ. ພາຍຫຼັງ​ປະ​ເທດສັງຄົມ​ນິຍົມຢູ່​ເອີ​ລົບ​ຕາ​ເວັນ​ອອກ​ລົ້ມລະລາຍ, ​ໄລຍະ​ແຕ່​ປີ 1992 ເຖິງປະຈຸ​ບັນ ​ໃນ​ແຕ່ລະ​ປີແມ່ນໄດ້ພົວພັນແລກປ່ຽນບົດຮຽນກວດກາພັກ,  ກວດກາ​ລັດ, ການສະກັດ​ກັ້ນ ​ແລະ ຕ້ານ​ການ​ສໍ້​ລາດ​ບັງ​ຫຼວງກັບ​ຄະນະ​ກຳມະການ​ກວດກາ​ພັກ-ກວດກາລັດ​ຂອງຫວຽດນາມ, ສ.ປ.ຈີນ, ຄະນະ​ກວດກາ​ຂອງ​ພັກ​ປະຊາຊົນ​ກຳປູ​ເຈຍ, ພັກ​ແຮງ​ງານ​ເກົາຫຼີ; ​ໄດ້ເຂົ້າເປັນ​ສະມາຊິກ​ອົງການ​ຕ້ານ​ການ​ສໍ້​ລາດ​ບັງ​ຫຼວງ​ຂອງ​ ບັນດາ​ປະ​ເທດ​ອາ​ຊຽນ,​ ເປັນ​ພາຄີປະຕິບັດສົນທິສັນຍາ​ຕ້ານ​ການ​ສໍ້​ລາດ​ບັງ​ຫຼວງ​ຂອງ​ສະຫະ​ປະຊາ​ຊາດ.

ສັງ​ລວມ​ແລ້ວ, ມາ​ຮອດ​ປະຈຸ​ບັນອົງການ​ກວດ ກາ​ ພັກ-ລັດ ​ແຕ່ລະ​ຂັ້ນແມ່ນ​ໜຶ່ງ​ໃນ​ອົງການ​ຈັດຕັ້ງ ຂອງ​ພັກ​ ​ແລະ ລັດ ທີ່ໄດ້​ຮ່ວມ​ກັບ​ບັນດາ​ອົງການ​ເສນາ​ທິການ​ຂອງ​ພັກ ປະກອບສ່ວນ​ຢ່າງ​​ໃຫຍ່​ຫຼວງ​ເຂົ້າໃນ​ພາລະ​ກິດ​ປົກ​ປັກ​ຮັກສາ ​ແລະ ສ້າງສາ​ປະເທດ ຊາດ,​​ ໄດ້​ປະກອບສ່ວນ​ຢ່າງ​ຕັ້ງໜ້າ​ເຂົ້າ​ໃນ​ວຽກ​ງານ​ກໍ່ສ້າງ​ ແລະ ປັບປຸງ​ພັກ​ໃຫ້​ມີ​ຄວາມ​ປອດ​ໃສໜັກ​ແໜ້ນ ​ແລະ ​ເຂັ້ມ​ແຂງ; ປະກອບສ່ວນ​ສຳຄັນ​ເຂົ້າ​ໃນ​ການກໍ່ສ້າງ​ ​ແລະ ປັບປຸງ​ການຈັດຕັ້ງ, ປັບປຸງ​ການ​ຄຸ້ມ​ຄອງ​ບໍລິຫານ​ລັດ ​ໃຫ້​ມີ​ຄວາມ​ສັກສິດ. ຄະນະພັກ, ອົງການ​ປົກຄອງແຕ່ລະຂັ້ນ ​ໄດ້​ມີ​ຄວາມເຂົ້າໃຈ​ນັບ​ມື້ແຈ້ງຂຶ້ນຕໍ່ຄວາມໝາຍ-ສຳຄັນ ​ແລະ ຄວາມ​ຈຳ​ເປັນຂອງ ວຽກງານກວດກາຕໍ່​ການ​ນຳພາ ​ແລະ ການ​ຄຸ້ມ​ຄອງຂອງ​ຕົນ; ໄດ້​ເອົາ​ໃຈ​ໃສ່​ປັບປຸງກົງຈັກການຈັດຕັ້ງ ແລະ ຄຸນນະພາບຂອງ ວຽກງານກວດກາ​​ໃຫ້​ດີ​ຂຶ້ນ​ເລື້ອຍໆ​, ຖັນ​ແຖວພະນັກງານກວດກາ​ໄດ້​ເພີ່ມຂຶ້ນທາງ​ດ້ານ​ຈຳນວນ ແລະ ຄຸນ​ນະພາ​ບ​%.

 
ຂະນະນີ້ທ່ານຢູ່ທີ່: ໜ້າ​ຫຼັກ ພາກ​ສະ​ເໜີ ປະ​ຫວັດ​ຄວາມ​ເປັນ​ມາ​ຂອງ ອກ​ລ